റോം: യുവേഫാ ചാംപ്യന്‍സ് ലീഗില്‍ ജയം പ്രതീക്ഷിച്ചിറങ്ങിയ ബാഴ്‌സലോണക്ക് തിരിച്ചടി. ഇറ്റാലിയന്‍ ക്ലബായ നാപോളിയാണ് ബാഴ്‌സലോണയെ 1-1 എന്ന സ്‌കോറിന് സമനിലയില്‍ തളച്ചത്. 89-ാം മിനുട്ടില്‍ ബാഴ്‌സ താരം അര്‍തുറോ വിദാലിന് ചുവപ്പ് കാര്‍ഡ് കണ്ടതും കാറ്റാലന്‍ പടക്ക് തിരിച്ചടിയായി. നാപോളിയുടെ മൈതാനത്ത് നടന്ന മത്സരത്തില്‍ ആദ്യം സ്‌കോര്‍ ചെയ്തത് നാപോളിയായിരുന്നു. 30-ാം മിനുട്ടില്‍ ഡെറിസ് മാര്‍ട്ടിനസായിരുന്നു നാപോളിയുടെ ഗോള്‍ നേടിയത്.  67 ശതമാനം പന്ത് കൈവശം വെച്ച് കളിച്ചിട്ടും ബാഴ്‌സലോണക്ക് ഗോള്‍ കണ്ടെത്താന്‍ കഴിഞ്ഞില്ല. നാപോളി പ്രതിരോധം ഉറച്ച് നിന്നതോടെ ബാഴ്‌സലോണയുടെ ഗോളവസരങ്ങള്‍ ഓരോന്നായി പാഴായി. ആദ്യ പകുതിയില്‍ നാപോളി ഒരു ഗോളിന്റെ ലീഡുമായി മടങ്ങി. എന്നാല്‍ രണ്ടാം പകുതിയിലെ ജീവന്‍മരണ പോരാട്ടത്തിനൊടുവില്‍ 57-ാം മിനുട്ടില്‍ അന്റോയിന്‍ ഗ്രിസ്മാനിലൂടെ ബാഴ്‌സല സമനില പിടിച്ചു. എന്നാല്‍ വിജയ ഗോള്‍ കണ്ടെത്താനുള്ള ബാഴ്‌സയുടെ ശ്രമങ്ങളെ നാപോളി പ്രതിരോധിച്ചു തോല്‍പിച്ചു. അടുത്ത മത്സരത്തില്‍ എവേ ഗോളിന്റെ ആനുകൂല്യം ബാഴ്‌സലോണക്ക് ലഭിക്കും. കാംപ് നൗവിലാണ് ഇരു ടീമുകളും തമ്മിലുള്ള അടുത്ത മത്സരം. രണ്ടാം പാദ മത്സരത്തില്‍ ബാഴ്‌സക്ക് ജയിക്കണമെങ്കില്‍ അല്‍പം വിയര്‍പ്പൊഴുക്കേണ്ടി വരും. ലൂയി സുവാരസ്, ഉസ്മാനെ ഡംബലെ, ജോദ്രി അലാബ, സെര്‍ജി റോബര്‍ട്ടോ, പിക്വെ എന്നിവര്‍ക്ക് പരുക്കാണ്. കാര്‍ഡ് കണ്ടത് കാരണം ബുസ്‌കിറ്റസ്, അര്‍തുറോ വിദാല്‍ എന്നിവര്‍ക്ക് അടുത്ത മത്സരം നഷ്ടമാവുകയും ചെയ്യും. ഈ പ്രതിസന്ധി മറികടക്കാനായാല്‍ ബാഴ്‌സക്ക് കാംപ്നൗവില്‍ നാപോളിയെ വീഴ്ത്താം. 

മറ്റൊരു മത്സരത്തില്‍ എതിരില്ലാത്ത മൂന്ന് ഗോളിന് ജര്‍മന്‍ വമ്പന്‍മാരായ ബയേണ്‍ മ്യൂണിക്ക് ചെല്‍സിയെ തകര്‍ത്തു. സ്വന്തം കാണികള്‍ക്ക് മുമ്പില്‍ ആശ്വാസ ഗോള്‍ പോലും കണ്ടെത്താന്‍ ചെല്‍സിക്ക് കഴിഞ്ഞില്ല. ആദ്യ പകുതിയില്‍ ഇരു ടീമുകളും ഒപ്പത്തിനൊപ്പം നിന്നു. 

എന്നാല്‍ രണ്ടാം പകുതിയില്‍ ബയേണിന്റെ തേരോട്ടമായിരുന്നു കണ്ടത്. 51-ാം മിനുട്ടില്‍ സെര്‍ജി ഗ്നാബ്രി ബയേണിന്റെ ആദ്യ ഗോള്‍ നേടി. ആദ്യ ഗോളിന്റെ ഷോക്ക് മാറും മുമ്പ് ഗ്നാബ്രിയിലൂടെ ബയേണിന്റെ രണ്ടാം ഗോളും പിറന്നു. 54-ാം മിനുട്ടിലായിരുന്നു ബയേണിന്റെ രണ്ടാം ഗോള്‍ പിറന്നത്. മികച്ച മുന്നേറ്റത്തിനൊടുവില്‍ 76-ാം മിനുട്ടില്‍ റോബര്‍ട്ട് ലെവന്‍ഡോസ്‌കിയും ബയേണിന് വേണ്ടി ഗോള്‍ കണ്ടെത്തി. ആശ്വാസ ഗോളിന് വേണ്ടി ചെല്‍സി കിണഞ്ഞ് ശ്രമിച്ചെങ്കിലും ശ്രമങ്ങളെല്ലാം പരാജയപ്പെട്ടു. രണ്ടാം പാദ മത്സരത്തില്‍ ചെല്‍സിക്ക് ഇനി തിരിച്ച് വരവിനുള്ള സാധ്യതകള്‍ കുറവാണ്. ബയേണിന്റെ തട്ടകമായ അലിയന്‍ അറീനയിലാണ് രണ്ടാം പാദ മത്സരം.