ന്യൂഡല്‍ഹി: പുല്‍വാമ ഭീകരാക്രമണ കേസില്‍ അറസ്റ്റിലായ പ്രതിക്ക് ഡല്‍ഹി പാട്യാല ഹൗസ് കോടതി ജാമ്യം അനുവദിച്ചു. എന്‍.ഐ.എ കുറ്റപത്രം സമര്‍പ്പിക്കാത്തതിനെ തുടര്‍ന്നാണ്  യൂസഫ് ചോപ്പന്‌ ജാമ്യം അനുവദിച്ചത്.2019 ഫെബ്രുവരി 14ന് പുല്‍വാമയില്‍ ജെയ്‌ഷെ ഭീകരര്‍ നടത്തിയ ഭീകരാക്രമണത്തില്‍ 40 സിആര്‍പിഎഫ് ജവാന്മാരാണ് കൊല്ലപ്പെട്ടത്. ഭീകരാക്രമണവുമായി ബന്ധപ്പെട്ട ഗൂഢാലോചന കേസാണ് യൂസഫ് ചോപ്പനെതിരെ ചുമത്തിയത്. കൂടുതല്‍ തെളിവുകള്‍ ശേഖരിക്കേണ്ടതുള്ളതിനാലാണ് കുറ്റപത്രം വൈകിയതെന്നാണ് എന്‍ഐഎ നല്‍കുന്ന വിശദീകരണം.

100 കിലോ സ്‌ഫോടക വസ്തുക്കള്‍ നിറച്ച കാര്‍ സി.ആര്‍.പി.എഫിന്റെ വാഹനത്തിന് നേരെ ഇടിച്ചു കയറ്റുകയായിരുന്നു. പുല്‍വാമ കാകപോറ സ്വദേശി ആദില്‍ അഹമ്മദായിരുന്നു ചാവേറായി കാര്‍ ഓടിച്ച് എത്തിയത്.മസൂദ് അസറിന്റെ ബന്ധു ഉസ്മാനെ ത്രാലില്‍ സുരക്ഷാ സേന വധിച്ചതിന്റെ പ്രതികാരമായായിരുന്നു പുല്‍വാമയിലെ ആക്രമണമെന്നാണ് നിഗമനം.പുല്‍വാമ ആക്രമണത്തിന് തിരിച്ചടി നല്‍കാന്‍ 12-ാം ദിവസം ഇന്ത്യ ബാലാക്കോട്ടിലെ തീവ്രവാദ പരിശീലന ക്യാമ്പുകള്‍ക്ക് നേരെ വ്യോമാക്രമണം നടത്തി.