മനാമ: ഇന്ത്യന്‍ സ്‌കൂളിലെ ഈ വര്‍ഷത്തെ പഞ്ചാബി ദിവസ് ആഘോഷ പരിപാടികള്‍ സ്‌കൂള്‍ ഇസടൗണ്‍ കാമ്പസില്‍ നടന്നു. സ്‌കൂളിലെ പഞ്ചാബി ഭാഷാ വകുപ്പിന്റെ നേതൃത്വത്തിലായിരുന്നു ആഘോഷ പരിപാടികള്‍. മുഖ്യാതിഥി തിലക് രാജ് സിംഗ് ദുആ (മാനേജിംഗ് ഡയറക്ടര്‍, അബിക് ഗ്രൂപ്പ് ഓഫ് കമ്പനീസ്) ഭദ്രദീപം കൊളുത്തി പരിപാടി ഉദ്ഘാടനം ചെയ്തു.

ചടങ്ങില്‍ ജസ്ബീര്‍ സിംഗ് (സെക്രട്ടറി, ഗുരുദ്വാര ഗുരുമത് വിദ്യാകേന്ദ്ര), ഇന്ത്യന്‍ സ്‌കൂള്‍ അസിസ്റ്റന്റ് സെക്രട്ടറി പ്രേമലത എന്‍.എസ്, സ്‌കൂള്‍ എക്‌സിക്യൂട്ടീവ് കമ്മിറ്റി അംഗം മുഹമ്മദ് ഖുര്‍ഷിദ് ആലം, പ്രിന്‍സിപ്പല്‍ വി.ആര്‍ പളനിസ്വാമി, സ്റ്റാഫ് പ്രതിനിധി ജോണ്‍സണ്‍ കെ. ദേവസ്സി, വൈസ് പ്രിന്‍സിപ്പല്‍മാര്‍, അധ്യാപകര്‍, വിദ്യാര്‍ഥികള്‍ എന്നിവര്‍ തദവസരത്തില്‍ സന്നിഹിതരായിരുന്നു.

വിവിധ മത്സരങ്ങളിലെ ജേതാക്കളെ വകുപ്പ് മേധാവി ബാബു ഖാന്‍ പ്രഖ്യാപിച്ചു. വിജയികള്‍ക്ക് ട്രോഫികളും സര്‍ട്ടിഫിക്കറ്റുകളും നല്‍കി. പഞ്ചാബി ഭാഷയെ കുറിച്ച് അധ്യാപിക രേവ റാണി അവതരണ പ്രസംഗം നടത്തി. അധ്യാപിക പര്‍മിന്ദര്‍ കോര്‍ നന്ദിയും പറഞ്ഞു.