ന്യൂഡല്‍ഹി: ആക്രമണത്തില്‍ ഡല്‍ഹി പൊലിസിന്റെ നിഷ്‌ക്രിയത്വവും പങ്കും വിവാദമായിരിക്കെ, പൊലിസിനെതിരേ രൂക്ഷ പ്രതികരണവുമായി എന്‍.ഡി.എ ഘടകകക്ഷിയുടെ പാര്‍ലമെന്റംഗം രംഗത്ത്. ശിരോമണി അകാലിദളിന്റെ പാര്‍ലമെന്റംഗമായ നരേഷ് ഗുജ്‌റാളാണ് പൊലിസിന്റെ നടപടികളെ വിമര്‍ശിച്ച് ആഭ്യന്തര മന്ത്രി അമിത് ഷായ്ക്ക് കത്തെഴുതിയത്.

മൗജ്പൂരില്‍ വീട്ടില്‍ കുടുങ്ങിയ മുസ്‌ലിംകളെ രക്ഷിക്കാന്‍ താന്‍ ആവശ്യപ്പെട്ടിട്ടും പൊലിസ് നടപടിയെടുത്തില്ലെന്നു വ്യക്തമാക്കിയ അദ്ദേഹം, ഞാന്‍ പാര്‍ലമെന്റംഗമാണെന്നു പൊലിസിനെ ബോധ്യപ്പെടുത്തണമെന്നും ആവശ്യപ്പെട്ടു. കുടുങ്ങിക്കിടന്ന മുസ്‌ലിംകളെ സംഘ്പരിവാര്‍ അക്രമികള്‍ അക്രമിക്കാനൊരുങ്ങുമ്പോഴായിരുന്നു അവരെ രക്ഷിക്കാന്‍ ഇദ്ദേഹം പൊലിസിനോട് ആവശ്യപ്പെട്ടിരുന്നത്.

തന്റെ പരാതി പൊലിസ് സ്വീകരിച്ചെങ്കിലും നടപടിയെടുത്തില്ലെന്നു വ്യക്തമാക്കിയ അദ്ദേഹം, അവിടത്തെ അവരുടെ അയല്‍ക്കാരായ ഹിന്ദു സഹോദരന്‍മാരാണ് ഒടുവില്‍ മുസ്‌ലിംകളുടെ സുരക്ഷയ്‌ക്കെത്തിയതെന്നും കൂട്ടിച്ചേര്‍ത്തു.