മേപ്പാടി: ഗവ. പോളി ടെക്‌നിക് കോളജിനായി താഞ്ഞിലോട് നിര്‍മാണം നടത്തുന്ന കെട്ടിടത്തിന് സംരക്ഷണ ഭിത്തി നിര്‍മിക്കുന്നതില്‍ അശാസ്ത്രീയമെന്ന് പരാതി. മുപ്പത് മീറ്റര്‍ ഉയരത്തില്‍ ചരിഞ്ഞ പ്രദേശത്താണ് കെട്ടിടം നിര്‍മിക്കുന്നത്.
കെട്ടിടത്തിന്റെ മുന്‍ഭാഗത്ത് മണ്ണ് നിരത്തിയതിനാലാണ് അപാകത. ചൂരല്‍മല മേപ്പാടി റോഡിന്റെ വശത്താണ് മുപ്പത് മീറ്റര്‍ ഉയരത്തില്‍ മണ്ണ് നികത്തിയത്. മൂന്ന് മീറ്റര്‍ ഉയരത്തില്‍ കല്‍മതില്‍ നിര്‍മിച്ച ശേഷം ബാക്കിയുള്ള ഭാഗം മണ്ണ് നികത്തിയിരിക്കുകയാണ്.
ഏത് സമയവും മണ്ണ് ഇടിഞ്ഞ് റോഡിലേക്ക് വീഴാനിടയുണ്ട്. ചെറിയ മഴ പെയ്താല്‍ പോലും റോഡിലേക്ക് മണ്ണ് ഒലിച്ചിറങ്ങുന്ന സ്ഥിതിയാണ്. നിരവധി കുടുംബങ്ങല്‍ താമസിക്കുന്ന പ്രദേശമാണിത്. സംരക്ഷണ ഭിത്തി നിര്‍മാണം ആരംഭിക്കുമ്പോള്‍ തന്നെ നാട്ടുകാര്‍ പരാതിപ്പെട്ടെങ്കിലും ബന്ധപ്പെട്ടവര്‍ നിര്‍മാണവുമായി മുന്നോട്ട് പോവുകയാണ്. സ്ഥിരമായി മണ്ണിടിച്ചിലുണ്ടാവുന്ന പ്രദേശത്താണ് യാതൊരു സുരക്ഷയുമില്ലാതെ ലോഡ് കണക്കിന് മണ്ണ് നികത്തിയിരിക്കുന്നത്. അശാസ്ത്രീയമായ നിര്‍മാണ പ്രവൃത്തി നിര്‍ത്തി വയ്ക്കണമെന്നാണ് നാട്ടുകാരുടെ ആവശ്യം.