ദോഹ: താലിബാന്‍ പ്രതിനിധികളുമായി ഖത്തറില്‍ നടക്കുന്ന ചര്‍ച്ചയില്‍ നിര്‍ണായക പുരോഗതിയെന്ന് യു.എസ്. കഴിഞ്ഞ കാലങ്ങളിലുണ്ടായതിനെക്കാള്‍ കാര്യക്ഷമമായ നേട്ടമാണുണ്ടായതെന്ന് യു.എസ്. പ്രതിനിധി സാല്‍മെ ഖലീല്‍സാദ് പറഞ്ഞു. ചര്‍ച്ചയിലെ പുരോഗതികള്‍ വ്യക്തമാക്കാന്‍ അദ്ദേഹം തയാറായില്ല. യു.എസ് പ്രതിനിധി സാല്‍മെ ഖലീല്‍സാദും താലിബാന്‍ നേതാക്കളും തമ്മില്‍ ഖത്തറിലാണ് ആറ് ദിവസത്തോളം ചര്‍ച്ച നടത്തുന്നത്.

അഫ്ഗാനില്‍ നിന്നുള്ള വിദേശ സൈനികരുടെ പിന്‍വാങ്ങല്‍ ഉള്‍പ്പെടെ പ്രധാന വിഷയങ്ങളില്‍ പുരോഗതിയുണ്ടായെന്ന് താലിബാന്‍ വക്താവ് സബീഹുല്ല മുജാഹിദ് പറഞ്ഞു. അതിനിടെ കൂടിക്കാഴ്ചയില്‍ കരാറിലെത്തിയെന്ന വാര്‍ത്ത അദ്ദേഹം തള്ളി. അഫ്ഗാനില്‍ നിന്ന് 18 മാസത്തിനുള്ളില്‍ വിദേശത്തെ സൈന്യത്തെ പൂര്‍ണമായും പിന്‍വലിക്കുമെന്ന വാര്‍ത്തയാണ് താലിബാന്‍ വക്താവ് തള്ളിയത്.