റിയാദ്: ഡൽഹിയിൽ അരങ്ങേറിയ വർഗീയ കലാപത്തിൽ പ്രതിഷേധവും ഉൽക്കണ്ഠയും രേഖപ്പെടുത്തിക്കൊണ്ട് ചില്ലയുടെ പ്രതിമാസ വായന നടന്നു. ആർ രാജശ്രീയുടെ കല്യാണിയെന്നും ദാക്ഷായണിയെന്നും പേരായ രണ്ടു സ്ത്രീകളുടെ കത എന്ന നോവൽ അവതരിപ്പിച്ചുകൊണ്ട് ബീനയാണ് വായനാനുഭവങ്ങൾക്ക് തുടക്കമിട്ടത്. ഫെയ്സ്ബുക്കിലൂടെ പങ്കുവെക്കുകയും പിന്നീട് പുസ്തകരൂപത്തിൽ ചുരുങ്ങിയ സമയം കൊണ്ട് പത്തിലേറെ പതിപ്പുകളിലെത്തുകയും ചെയ്ത നോവൽ വടക്കൻ മലബാറിന്റെ സവിശേഷ ഭാഷാ സമൃദ്ധികൊണ്ടും സ്ത്രീപക്ഷ ബോധം കൊണ്ടും പ്രസക്തമായ ഒരു രചനയാണെന്ന് ബീന പറഞ്ഞു. വർത്തമാനകാല ഇന്ത്യയുടെ ഫാസിസ്റ്റ് രാഷ്ട്രീയത്തിന്റെ പ്രചോദനങ്ങളിൽ ഒന്നായി കരുതപ്പെടുന്ന അഡോൾഫ് ഹിറ്റ്ലറുടെ മെയ്ൻ കാംഫ് എന്ന ആത്മകഥയുടെ വായനാനുഭവം ഇഖ്ബാൽ കൊടുങ്ങല്ലൂർ നടത്തി.  ഇന്ത്യയിൽ എങ്ങനെയാണോ വൈവിദ്ധ്യങ്ങളെ തച്ചുടച്ച് ഏകശിലാസംസ്കൃതി കൊണ്ടുവരാൻ സംഘപരിവാർ ശ്രമിക്കുന്നത് അതേവിധം വംശശുദ്ധി മഹിമയുടെ പ്രമാണമാണ് മെയ്ൻ കാംഫ് എന്ന് ഇഖ്ബാൽ അഭിപ്രായപ്പെട്ടു. സബീന എം സാലിയുടെ വെയിൽ വഴിയിലെ ശലഭസഞ്ചാരങ്ങൾ എന്ന ഓർമ്മപുസ്തകം നിഖില സമീറും അനിൽ ദേവസിയുടെ യാ ഇലാഹി ടൈംസ് എന്ന നോവൽ കൊമ്പൻ മൂസയും കെ ആർ മീരയുടെ സൂര്യനെ അണിഞ്ഞ ഒരു സ്ത്രീ എന്ന നോവൽ വിപിനും പങ്കുവെച്ചു.   

തുടർന്നു നടന്ന സംവാദത്തിൽ വംശഹത്യചെയ്യപ്പെടുന്ന ഇന്ത്യൻ മതനിരപേക്ഷ-ജനാധിപത്യത്തെ കുറിച്ചുള്ള ആശങ്കകൾ പങ്കെടുത്തവരെല്ലാം പങ്കുവെച്ചു.  വിദ്വേഷം പരത്തുന്നതിനു പകരം മാനവികതയിലേക്ക് ഓരോ സഹജീവിയേയും അടുപ്പിക്കാനുള്ള ഉദ്യമത്തിൽ നമ്മൾ ഓരോരുത്തരും പങ്കാളികളാകേണ്ടതുണ്ട് എന്ന് സംവാദം ഓർമ്മിപ്പിച്ചു.  സംവാദത്തിൽ സുബ്രഹ്മണ്യൻ, സുലൈമാൻ, ഹരികൃഷ്ണൻ, നജീം കൊച്ചുകലുങ്ക്, ജോഷി പെരിഞ്ഞനം, അബ്ദുൽ റസാഖ്, മനോഹരൻ, ഡോ. ഹസീന, ബീന, കൊമ്പൻ മൂസ, വിപിൻ എന്നിവർ പങ്കെടുത്തു. സുരേഷ് ലാൽ സംവാദം ഉപസംഹരിച്ചു. എം ഫൈസൽ മോഡറേറ്ററായിരുന്നു.