തിരുവനന്തപുരം: സംസ്ഥാന ഗവര്‍ണറുടെ ആതിഥേയത്വം സ്വീകരിച്ച് ഇടുക്കി തായണ്ണന്‍കുടിയില്‍ നിന്നുമെത്തിയ ആദിവാസി കര്‍ഷകസംഘം തികഞ്ഞ മനസംതൃപ്തിയോടെ മടങ്ങി. തായണ്ണന്‍കുടി മൂപ്പനെ പൊന്നാടയണിയിച്ചാണ് ഗവര്‍ണര്‍ ജസ്റ്റിസ് പി. സദാശിവം വിരുന്ന് സല്‍കാര ചടങ്ങില്‍ സ്വാഗതം ചെയ്തത്.  ഇടുക്കി ജില്ലയിലെ ദേവികുളം താലൂക്കില്‍ മറയൂര്‍ പഞ്ചായത്ത് പരിധിയില്‍ വരുന്ന ആദിവാസി കര്‍ഷകരാണ് തായണ്ണന്‍കുടി നിവാസികള്‍. ഇവിടുത്തെ പ്രധാന താമസക്കാര്‍ മുതുവാന്‍ വിഭാഗത്തില്‍പ്പെട്ടവരാണ്. സമുദ്രനിരപ്പില്‍ നിന്നും ഏകദേശം 2372 മീറ്റര്‍ ഉയരത്തിലാണ് ചിന്നാര്‍ വന്യജീവി സങ്കേതം സ്ഥിതിചെയ്യുന്നത്. ഇവിടെ തായണ്ണന്‍കുടി ഉള്‍പ്പെടെ ആകെ 11 മനുഷ്യവാസ മേഖലകള്‍ ആണ് ഉളളത്. തായണ്ണന്‍ കുടിയില്‍ 35 കുടുംബങ്ങളിലായി 102 പേരാണ് താമസിക്കുന്നത്. 165 ഹെക്ടര്‍ വനവിസ്തൃതിയുളള പ്രദേശത്ത്
15 ഹെക്ടര്‍ സ്ഥലത്താണ് ഇവര്‍ കൃഷിചെയ്തുവരുന്നത്. ഇവരുടെ പ്രധാന കൃഷികള്‍ ചെറുധാന്യങ്ങള്‍, പച്ചക്കറികള്‍ എന്നിവയാണ്. ചെറുധാന്യങ്ങളില്‍ പ്രധാനമായും കൃഷിചെയ്യുന്നത് റാഗി, തിന തുടങ്ങിയവയാണ്.
പച്ചക്കറികളില്‍ പ്രധാനമായി കൃഷിചെയ്യുന്നത് കുത്ത് ബട്ടര്‍, കൊടി ബട്ടര്‍, മുരിങ്ങ ബീന്‍സ് എന്നിവയാണ്. കേന്ദ്രസര്‍ക്കാരിന്റെ പ്ലാന്റ് ജീനോം സേവിയര്‍ അവാര്‍ഡ് തായണ്ണന്‍കുടി സംഘത്തിനാണ് ലഭിച്ചിട്ടുളളത്. 2016-ലെ കേന്ദ്രസംസ്ഥാന സര്‍ക്കാരിന്റെ മികച്ച കൃഷി നടത്തുന്ന ആദിവാസി ഊരുകള്‍ക്കുളള സമ്മാനവും ഇവര്‍ കൈപ്പറ്റുകയുണ്ടായി. ചന്ദ്രന്‍ കാണിമൂപ്പന്‍,കാണിയുടെ ഭാര്യ കാന്തമ്മ, സുമിത്രി, എന്നിവരാണ് തായണ്ണന്‍കുടിയില്‍ നിന്ന് സത്കാരചടങ്ങില്‍ പങ്കെടുത്തത്.
ഇവര്‍ക്കൊപ്പം ഇടുക്കി ജില്ല പ്രിന്‍സിപ്പല്‍ കൃഷി ഓഫീസര്‍ ആന്‍സി ജോണ്‍, ഇടുക്കി മറയൂര്‍ കൃഷിഓഫിസര്‍ പ്രിയ പീറ്റര്‍, കൃഷിഅസിസ്റ്റന്റ് എയ്ഞ്ചല്‍ സി. റോയ് എന്നിവരും ഉണ്ടായിരുന്നു. തമിഴിലായിരുന്നു ഗവര്‍ണര്‍ കര്‍ഷകരോട് സംവദിച്ചത്. ഒരു കര്‍ഷകന്‍ കൂടിയായ തനിക്ക് കര്‍ഷകരെ ആദരിക്കുക എന്നത് ഏറെ ആഹ്ലാദം തരുന്ന മൂഹൂര്‍ത്തമാണെന്നും ഗവര്‍ണര്‍ അഭിപ്രായപ്പെട്ടു.