മലപ്പുറം: തെരഞ്ഞെടുപ്പ് പ്രചാരണത്തിനായി പോകുന്നതിനിടെ മന്ത്രി ഒ.ആര്‍ കേളുവും എല്‍ഡിഎഫ് നേതാക്കളും ചങ്ങാടത്തില്‍ കുടുങ്ങി. തെരഞ്ഞെടുപ്പ് പ്രചാരണത്തിനായി മലപ്പുറം വഴിക്കടവ് പുഞ്ചക്കൊല്ലി ആദിവാസി നഗറിലേക്ക് പോകുന്ന വഴി പുന്നപ്പുഴ കടക്കുന്നതിനിടെയാണ് മന്ത്രി ഒ ആര്‍ കേളുവും അദ്ദേഹത്തോടൊപ്പമുണ്ടായിരുന്നവരും ചങ്ങാടത്തില്‍ കുടുങ്ങിയത്. 

ഇന്നലെ വൈകിട്ട് 5.15 ഓടെയാണ് സംഭവം. മുള കൊണ്ട് നിര്‍മിച്ച ചങ്ങാടത്തില്‍ പോകുന്നതിനിടെ ചങ്ങാടം പുഴയിലെ വലിയ കല്ലില്‍ തടഞ്ഞ് മുന്നോട്ട് നീങ്ങാനാകാതെ പുഴയില്‍ കുടുങ്ങിപോവുകയായിരുന്നു. സംഭവം അറിഞ്ഞ് പൊലിസും നാട്ടുകാരും തണ്ടര്‍ബോള്‍ട്ട് സംഘവും ചേര്‍ന്ന് അരമണിക്കൂറോളം നീണ്ട ശ്രമത്തിനൊടുവില്‍ മന്ത്രിയെയും മറ്റു നേതാക്കളെയും രക്ഷപ്പെടുത്തി കരയ്‌ക്കെത്തിക്കുകയായിരുന്നു. മന്ത്രിയുള്‍പ്പെടെ 10 പേരാണ് ചങ്ങാടത്തിലുണ്ടായിരുന്നത്. 

 2018ലെ പ്രളയത്തിലാണ് പുന്നപ്പുഴക്ക് കുറുകെയുള്ള പാലം തകര്‍ന്നത്. ഇതോടെ പുഞ്ചക്കൊല്ലാ ആദിവാസി നഗറിലെ കുടുംബങ്ങള്‍ പുഴ കടക്കാന്‍ ഉപയോഗിക്കുന്നത് മുള ചങ്ങാടമാണ്.