കോഴിക്കോട്: കോഴിക്കോടിന്റെ സാംസ്‌കാരിക ചിത്രത്തില്‍ സജീവമായിരുന്ന തിക്കോടിയന്‍ നര്‍മഭാഷണത്തിലൂടെ ഏതുവിഷയത്തെയും ജനങ്ങള്‍ക്കു മുന്‍പില്‍ അവതരിപ്പിക്കാന്‍ കഴിയുന്ന വ്യക്തിത്വമായിരുന്നുവെന്ന് ഡോ. എം.ജി.എസ് നാരായണന്‍. പുഷ്പശ്രീ ട്രസ്റ്റിന്റെ ആഭിമുഖ്യത്തില്‍ തിക്കോടിയന്‍ അനുസ്മരണ സമിതി ഏര്‍പ്പെടുത്തിയ 18-ാം ചരമവാര്‍ഷിക ദിന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പണ്ഡിതന്‍മാരോടും സാധാരണക്കാരോടും സാധാരണക്കാരന്റെ ഭാഷയിലാണ് അദ്ദേഹം സംസാരിച്ചത്. കോഴിക്കോടിന്റെ പൊതുരംഗം ശുഷ്‌കമായ ഈ കാലത്ത് ഏതു വിഷയത്തെയും നര്‍മഭാവത്തില്‍ സംസാരിക്കാന്‍ കഴിയുന്ന അങ്ങനെയൊരാള്‍ ഇന്നും ആവശ്യമാണ്. അതുപോലൊരാള്‍ ഇല്ലല്ലോ എന്നത് വലിയ ദുഃഖവുമാണ്- എം.ജി.എസ് പറഞ്ഞു.
കോഴിക്കോടിന്റെ വൈകുന്നേരങ്ങളെ മധുരമുള്ളതാക്കി മാറ്റിയ മനുഷ്യ സ്‌നേഹിയായിരുന്നു തിക്കോടിയനെന്ന് മുഖ്യപ്രഭാഷണം നടത്തിയ യു.എ ഖാദര്‍ അഭിപ്രായപ്പെട്ടു. എല്ലാവരെയും ചിരിപ്പിച്ച് എല്ലാവര്‍ക്കും വേണ്ടപ്പെട്ടവനായി മാറിയ അദ്ദേഹവുമായുള്ള ദീര്‍ഘകാലത്തെ അനുഭവവും യു.എ ഖാദര്‍ സദസുമായി പങ്കുവച്ചു. ചടങ്ങില്‍ അഡ്വ. പി. രാധാകൃഷ്ണന്‍ അധ്യക്ഷനായി.