മഞ്ചേരി: വിദ്യാര്‍ഥികള്‍ക്കു കഞ്ചാവ് വില്‍പന നടത്തിയയാളെ പൊലിസ് പിടികൂടി. മഞ്ചേരി കോഴിക്കാട്ടുകുന്ന് മേലാക്കം ഹംസ (48) യെയാണ് കഞ്ചാവ് വില്‍പനയ്ക്കിടെ മഞ്ചേരി ഐ.ജിബി.ടി ബസ് സ്റ്റാന്‍ഡ് പരിസരത്തുനിന്നു സി.ഐ ബിജു, എസ്.ഐ കൈലാസ്‌നാഥ് എന്നിവരുടെ നേതൃത്വത്തിലുള്ള പ്രത്യേക അന്വേഷണ സംഘം പിടികൂടിയത്.
ഇയാളില്‍നിന്നു 50 കഞ്ചാവ് പാക്കറ്റുകള്‍ കണ്ടെടുത്തു. മഞ്ചേരിയിലെ വിവിധ വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ചു കഞ്ചാവ് മാഫിയ പിടിമുറുക്കുന്നതായുള്ള രഹസ്യവിവരത്തിന്റെ അടിസ്ഥാനത്തില്‍ പ്രത്യേക  അന്വേഷണ സംഘം നിരീക്ഷണം ശക്തമാക്കിയിരുന്നു.
രണ്ടു ദിവസം മുന്‍പു തിരുവനന്തപുരം സ്വദേശി സുനില്‍ എന്നയാളെ 30 പാക്കറ്റ് കഞ്ചാവുമായി പിടികൂടിയിരുന്നു. ഇന്നലെ  പിടിയിലായ പ്രതിയെ ചോദ്യം ചെയ്തതില്‍ മഞ്ചേരിയിലും പരിസര പ്രദേശങ്ങളിലേയും കഞ്ചാവ് ഉപയോഗിക്കുന്ന കൂട്ടികളെക്കുറിച്ചും വിവരം ലഭിച്ചിട്ടുണ്ട്. പ്രതിയെ കോടതിയില്‍ ഹാജരാക്കി. പി. സഞ്ജീവ്, ഉണ്ണികൃഷ്ണന്‍ മാരാത്ത്, സജയന്‍, സലീം എന്നിവരും അന്വേഷണ സംഘത്തില്‍ ഉണ്ടായിരുന്നു.