കൊളക്കാട്: കുരിശുമല പുളിഞ്ഞോടിലെ കുഴിയാനി മറ്റത്തിന്‍ ആന്‍ഡ്രൂസിന്റെ വീട് തകര്‍ന്നപ്പോള്‍ കുടുംബാഗങ്ങള്‍ അത്ഭുതകരമായി രക്ഷപ്പെട്ടു. ഇന്നലെ ഉച്ചയ്ക്ക് 12.30 ഓടെയായിരുന്നു സംഭവം. അപകട സമയത്ത് ആന്‍ഡ്രൂസും ഭാര്യ ജെസിയും വീട്ടിലുണ്ടായിരുന്നെങ്കിലും മേല്‍ക്കൂര തകരുന്ന ശബ്ദംകേട്ട് പുറത്തേക്ക് ഓടിയതിനാല്‍ ഇരുവരും പരുക്കേല്‍ക്കാതെ രക്ഷപ്പെടുകയായിരുന്നു. കാലപ്പഴക്കത്താല്‍ വീട് അപകടാവസ്ഥയിലായിരുന്നു. സര്‍ക്കാര്‍ ലൈഫ് പദ്ധതിയില്‍ ഉള്‍പ്പെടുത്തി വീട് നിര്‍മിക്കാനായി പഞ്ചയാത്തിലും പഞ്ചായത്ത് സെക്രട്ടറിക്കും പേരാവൂര്‍ ബ്ലോക്കിലും ജില്ലാ കലക്ടര്‍ക്കുമുള്‍പ്പെടെയുള്ളവര്‍ക്ക് അപേക്ഷ നല്‍കിയെങ്കിലും വീട്ടുനമ്പറുള്ളതിനാല്‍ അപേക്ഷ നിരസിക്കുകയാണ് ഉണ്ടായതെന്നു ആന്‍ഡ്രൂസ് പറഞ്ഞു. 15 സെന്റ് സ്ഥലം മാത്രമാണ് ഇവര്‍ക്കുള്ളത്. വീട് തകര്‍ന്നതിനെ തുടര്‍ന്ന് വീട്ടുപകരണങ്ങളും നശിച്ചു. പഞ്ചായത്ത് വൈസ്പ്രസിഡന്റും അംഗങ്ങളും വീട് സന്ദര്‍ശിച്ചു. നാട്ടുകാരും കുടുംബാംഗങ്ങളും ചേര്‍ന്നാണ് തകര്‍ന്ന വീടിന്റെ മേല്‍ക്കൂരയുടെ ഓടുകള്‍ നീക്കം ചെയ്തത്.