മേപ്പാടി: മേലെ അരപ്പറ്റയില്‍ പുലിയെ ചത്ത നിലയില്‍ കണ്ടെത്തി. ആറാംനമ്പറിലെ തേയില തോട്ടത്തിലാണ് പുലിയുടെ ജഡം കണ്ടെത്തിയത്. ഒരാഴ്ചത്തെ പഴക്കമാണ് കണക്കാക്കുന്നത്. ആറ് വയസ്സ് പ്രായം കണക്കാക്കുന്ന ആണ്‍ പുലിയെയാണ് ചത്ത നിലയില്‍ കണ്ടെത്തിയത്.
ഇന്നലെ തേയില തോട്ടത്തില്‍ ജോലിക്ക് പോയ തൊഴിലാളികളാണ് ജഡം ആദ്യമായി കണ്ടത്. വന്യജീവി വകുപ്പിലെ വിദഗ്ധ സംഘം എത്തിയ ശേഷം ഇന്ന് രാവിലെ പോസ്റ്റ് മോര്‍ട്ടം നടക്കും.
പുലി ചാവാനിടയായ സാഹചര്യം വ്യക്തമല്ല. പ്രദേശത്ത് സ്ഥിരമായി പുലി ഇറങ്ങി വളര്‍ത്ത് മൃഗങ്ങളെ പിടികൂടാറുണ്ടന്ന് നാട്ടുകാര്‍ പറഞ്ഞു.
ഏതാനും വര്‍ഷങ്ങള്‍ക്ക് മുമ്പ് ഈ പ്രദേശത്ത് തന്നെ പുലി വാഹനം ഇടിച്ച് ചത്തിരുന്നു. ഫോറസ്റ്റ് ഓഫിസര്‍ ഹരിചന്ദ്രനും സംഘവും സ്ഥലം സന്ദര്‍ശിച്ചു.