ന്യൂഡല്‍ഹി: ആര്‍.എസ്.എസ് നേതാവ് കതിരൂര്‍ മനോജ് കൊല്ലപ്പെട്ട കേസിന്റെ വിചാരണ എറണാകുളം സി.ബി.ഐ കോടതിയിലേക്കു മാറ്റാന്‍ സുപ്രിംകോടതി ഉത്തരവ്. വിചാരണ തലശ്ശേരി കോടതിയില്‍ തന്നെ തുടരണമെന്ന സംസ്ഥാന സര്‍ക്കാരിന്റെ ആവശ്യം തള്ളിയാണ് ജസ്റ്റിസ് എ.കെ ഗോയല്‍ അധ്യക്ഷനായ സുപ്രിംകോടതി ബെഞ്ചിന്റെ നടപടി.
കേസില്‍ 25-ാം പ്രതിയായ സി.പി.എം കണ്ണൂര്‍ ജില്ലാ സെക്രട്ടറി പി. ജയരാജന്‍ ഉള്‍പ്പെടെയുള്ളവര്‍ അടുത്തമാസം പത്തിന് എറണാകുളം സി.ബി.ഐ കോടതി മുന്‍പാകെ ഹാജരാകണമെന്നും സുപ്രിംകോടതി ഉത്തരവിട്ടു. വിചാരണ തലശ്ശേരിയില്‍നിന്ന് എറണാകുളത്തേക്ക് മാറ്റണമെന്നാവശ്യപ്പെട്ട് സി.ബി.ഐ സമര്‍പ്പിച്ച ഹരജിയിലാണ് സുപ്രിംകോടതിയുടെ നടപടി. കോടതി മാറ്റി ഉത്തരവ് പുറപ്പെടുവിച്ച സാഹചര്യത്തില്‍ വിചാരണ കേരളത്തിന് പുറത്തേക്കു മാറ്റണമെന്ന് ആവശ്യപ്പെട്ട് ആര്‍.എസ്.എസ് നേതാവ് പി. ശശിധരന്‍ കഴിഞ്ഞ ഓഗസ്റ്റില്‍ സുപ്രിംകോടതിയില്‍ നല്‍കിയ ഹരജി പിന്‍വലിച്ചു.
ഇന്നലെ ഹരജി പരിഗണിക്കുന്നതിനിടെ ക്രിമിനല്‍ നടപടി ചട്ടപ്രകാരം വിചാരണ നടക്കേണ്ടത് തലശ്ശേരി സെഷന്‍സ് കോടതിയിലാണെന്ന് സംസ്ഥാന സര്‍ക്കാര്‍ വാദിച്ചു. അഴിമതി നിരോധന നിയമപ്രകാരമുള്ള കേസുകളില്‍ മാത്രമാണ് സി.ബി.ഐ പ്രത്യേക കോടതിയില്‍ വിചാരണ വേണ്ടതെന്നും സര്‍ക്കാരിനുവേണ്ടി ഹാജരായ മുതിര്‍ന്ന അഭിഭാഷകന്‍ സി.യു സിങ് വാദിച്ചു.
യു.എ.പി.എ, എന്‍.ഐ.എ നിയമങ്ങള്‍പ്രകാരം വിചാരണ നടക്കേണ്ടത് തലശ്ശേരിയിലാണെന്ന് കേസിലെ പ്രതിയായ സി. പ്രകാശനുവേണ്ടി ഹാജരായ മുതിര്‍ന്ന അഭിഭാഷകന്‍ സിദ്ധാര്‍ഥ് ലൂത്രയും ചൂണ്ടിക്കാട്ടി. എന്നാല്‍, സി.ബി.ഐ അന്വേഷിച്ച കേസുകളില്‍ വിചാരണ പ്രത്യേക കോടതിയിലാണു നടക്കേണ്ടതെന്നു പറഞ്ഞ സുപ്രിംകോടതി, തുടര്‍വിചാരണ സി.ബി.ഐ കോടതിയായ എറണാകുളം അഡിഷനല്‍ സെഷന്‍സ് കോടതിയിലേക്കു മാറ്റാന്‍ ഉത്തരവിടുകയായിരുന്നു.
2014 സെപ്റ്റംബര്‍ ഒന്നിനാണ് മനോജ് കൊല്ലപ്പെട്ടത്. രാഷ്ട്രീയഗൂഢാലോചനയെ തുടര്‍ന്നാണ് മനോജ് കൊല്ലപ്പെട്ടതെന്നും ജയരാജനാണു കൊലപാതകത്തിന്റെ മുഖ്യ ആസൂത്രകനെന്നും സി.ബി.ഐ കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു. ലോക്കല്‍ പൊലിസും ക്രൈംബ്രാഞ്ചും അന്വേഷിച്ച കേസ് ഒക്ടോബര്‍ 28നാണ് സി.ബി.ഐ ഏറ്റെടുത്തത്.