വര്‍ക്കല: ഡ്രൈവിങ് ടെസ്റ്റ് ഗ്രൗണ്ടില്‍ അതിക്രമിച്ച് കടന്ന സാമൂഹ്യ വിരുദ്ധര്‍ വളപ്പിനുള്ളില്‍ പാര്‍ക്ക് ചെയ്തിരുന്ന വാഹനങ്ങള്‍ക്ക് തീയിട്ടതായി പരാതി. വര്‍ക്കല രഘുനാഥപുരത്തെ ടെസ്റ്റ് ഗ്രൗണ്ടില്‍ കഴിഞ്ഞ ദിവസം രാത്രി 12 മണിയോടെയാണ് സംഭവം.
മേലെ വെട്ടൂര്‍ സ്വദേശി ഫിറോസിന്റെ ഉടമസ്ഥതയിലുള്ള ദേവു ഡ്രൈവിങ് സ്‌കൂളിന്റെ ഓട്ടോക്കും കാറുകള്‍ക്കുമാണ് നാശനഷ്ടമുണ്ടായത്. ടാര്‍പ്പാളില്‍ വിതാനിച്ച മേലാപ്പിന് താഴെയുണ്ടായിരുന്ന ഓട്ടോയ്ക്ക് തീയിട്ടതായാണ് അനുമാനിക്കുന്നത്. തീ പടര്‍ന്ന് ഓട്ടോ ഭാഗികമായി കത്തി നശിച്ചു. ടാര്‍പ്പാളിനില്‍ തീ പടര്‍ന്നതിനാല്‍ ഇത് ഉരുകി വീണ് സമീപത്ത് പാര്‍ക്ക് ചെയ്തിരുന്ന രണ്ട് കാറുകള്‍ക്കും കേടുപാടുണ്ടായി. അപകടം ശ്രദ്ധയില്‍പ്പെട്ട സമീപ വാസികള്‍ എത്തിയാണ് തീ കെടുത്തിയത്. തുടര്‍ന്ന് ഫിറോസിനെ വിവരമറിയിക്കുകയായിരുന്നു.
സംഭവമറിഞ്ഞ് വര്‍ക്കല പൊലിസെത്തി തെളിവെടുത്തു. രാത്രികാലങ്ങളില്‍ വളപ്പിനുള്ളില്‍ സാമൂഹ്യ വിരുദ്ധരുടെ ശല്യമുള്ളതായും ഇതിനുള്ളില്‍ മദ്യപാന്മാര്‍ സംഘം ചേരുന്നതായും ഫിറോസ് പറയുന്നു. ഇത് സംബന്ധിച്ച് വര്‍ക്കല പൊലിസില്‍ ഒന്നില്‍ കൂടുതല്‍ പരാതി നല്‍കിയിട്ടുണ്ട്. പൊലിസ് കേസെടുത്ത് അന്വേഷണം ആരംഭിച്ചു.