ഗൂഡല്ലൂര്‍: കാട്ടാനക്കൂട്ടം മഴവന്‍ ചേരമ്പാടിയില്‍ വീടുകള്‍ തകര്‍ത്തു. ശേഖരന്‍, കോസിലാന്‍ഡിലെ യൂസുഫ് എന്നിവരുടെ വീടുകളാണ് തകര്‍ത്തത്. ബാലസുന്ദരന്റെ വീടിന് മുന്‍ വശത്തെ ചുറ്റുമതിലും തകര്‍ത്തിട്ടുണ്ട്.
തേയില തോട്ടത്തില്‍ ജോലിയെടുക്കുകയായിരുന്ന മൂന്ന് സ്ത്രീ തൊഴിലാളികള്‍ക്ക് ഓടുന്നതിനിടെ നിലത്ത് വീണ് പരുക്കേറ്റു. വിജയറാണി, ഗീത, ജ്ഞാനസുന്ദരി എന്നിവര്‍ക്കാണ് പരുക്കേറ്റത്. ഇവരെ ചേരമ്പാടിയിലെ എസ്റ്റേറ്റ് ആശുപത്രിയില്‍ പ്രവേശിപ്പിച്ചു. വിവരമറിഞ്ഞ് ചേരമ്പാടി റെയ്ഞ്ചര്‍ ഗണേഷന്റെ നേതൃത്വത്തിലുള്ള വനപാലക സംഘം സ്ഥലത്തെത്തി പടക്കം പൊട്ടിച്ച് കാട്ടാനകളെ വനത്തിലേക്ക് തുരത്തിയോടിക്കുകയായിരുന്നു.
അതേസമയം തുരത്തുന്നതിനിടെ കാട്ടാനകള്‍ വനപാലകര്‍ക്ക് നേരെ തിരിഞ്ഞത് ഭീതിപരത്തി. പ്രദേശത്ത് ഭീകരാന്തരീക്ഷം സൃഷ്ടിച്ച കാട്ടാനകളെ മണിക്കൂറുകളോളം നടത്തിയ പരിശ്രമത്തിനൊടുവിലാണ് തുരത്തിയത്.