മണ്ണാര്‍ക്കാട്: നിയന്ത്രണംവിട്ട സ്വകാര്യ ബസ് ഞെട്ടരക്കടവ് പാലത്തില്‍ കൈവരികള്‍ തകര്‍ത്തു. ഇന്നലെ രാവിലെ പതിനൊന്നരയോടെയാണ് സംഭവം. മണ്ണാര്‍ക്കാട് നിന്നു കൂട്ടിലക്കടവിലേക്ക് പോവുകയായിരുന്ന താഴത്തെ കല്ലടി ഗാലക്‌സി ബസാണ് അപകടത്തില്‍പ്പെട്ടത്.
ഇറക്കം ഇറങ്ങി വരികയായിരുന്ന ബസിന്റെ ആക്‌സില്‍ തകര്‍ന്നതാണ് നിയന്ത്രണം വിടാന്‍ കാരണമായി പറയുന്നത്. കൈവരികള്‍ തകര്‍ത്ത ബസിന്റെ ഒരു ചക്രം പുഴയിലേക്ക് തൂങ്ങിനിന്നു. വെളളിയാഴ്ച ആയതിനാല്‍ യാത്രക്കാരുടെ എണ്ണത്തിലുളള കുറവാണ് തലനാരിഴക്ക് വന്‍അപകടം ഒഴിവാകാന്‍ കാരണം. ഒരു വാഹനത്തിന് മാത്രം കടന്നുപോകാവുന്ന പാലത്തില്‍ ബസ് പുഴയിലേക്ക് തൂങ്ങിനിന്നതോടെ റോഡില്‍ വൈകുന്നേരം വരെ ഗതാഗതം തടസപ്പെട്ടു.