പയ്യന്നൂര്‍: ദേശീയപാതയില്‍ പയ്യന്നൂര്‍ കണ്ടോത്ത് വാഹനാപകടത്തില്‍ എ.എസ്.ഐ ഉള്‍പ്പെടെ മൂന്നു പൊലിസുകാര്‍ക്കു പരുക്കേറ്റു. ഇന്നലെ പുലര്‍ച്ചെ 1.20ഓടെയായിരുന്നു അപകടം. പൊലിസ് വാഹനത്തിന്റെ പിറകില്‍ ചരക്കുലോറി ഇടിക്കുകയായിരുന്നു. എ.എസ്.ഐ സുനില്‍കുമാര്‍, സിവില്‍ പൊലിസ് ഓഫിസര്‍ ഷമീം, ഡ്രൈവര്‍ രാജേഷ് എന്നിവര്‍ക്കാണു പരുക്കേറ്റത്. ഇവരെ താലൂക്ക് ആശുപത്രിയില്‍ പ്രവേശിപ്പിച്ചു.
രാത്രി പട്രോളിങ് നടത്തവെ പൊലിസ് സംഘം സഞ്ചരിച്ച വാഹനത്തില്‍ പിറകില്‍ നിന്നെത്തിയ ചരക്ക് ലോറി ഇടിക്കുകയായിരുന്നു. അപകടത്തില്‍ പൊലിസ് വാഹനത്തിന്റെ ഒരുഭാഗം തകര്‍ന്നു. അശ്രദ്ധമായി വാഹനമോടിച്ച് അപകടം വരുത്തിയതിനു ലോറി ഡ്രൈവര്‍ക്കെതിരേ പൊലിസ് കേസെടുത്തു.