ആലുവ: വളര്‍ത്തു നായ സ്ഥിരമായി കുരയ്ക്കുന്നതില്‍ വൈരാഗ്യം തീര്‍ക്കാന്‍ അയല്‍വാസിയെ കുത്തി.
കീഴ്മാട് കുട്ടമശ്ശേരി സൂര്യനഗറില്‍ കോട്ടായി വീട്ടില്‍ കെ.എം വേണുഗോപാലിനെ(55), അയല്‍വാസിയും ഫോര്‍ട്ട്‌കൊച്ചി സ്വദേശിയുമായ അക്ബറാണ് കുത്തിയത്. വേണുഗോപാലിന്റെ വീട്ടിലെ വളര്‍ത്തു നായ കുരയ്ക്കുന്നതിനെ ചൊല്ലി നിലനിന്ന തര്‍ക്കമാണ് കത്തിക്കുത്തില്‍ കലാശിച്ചത്.
ഇന്നലെ ഉച്ചയോടെയാണ് സംഭവം. വീട്ടില്‍ വിറക് ഉണക്കുകയായിരുന്ന വേണുഗോപാലിനെ അക്ബര്‍ പിന്നിലൂടെയെത്തി കത്തികൊണ്ട് കുത്തുകയായിരുന്നു. വേണുവിന്റെ ഭാര്യ ഈ സമയം ജോലിയ്ക്കായി പോയിരിക്കുകയായിരുന്നു. അക്ബര്‍ സ്ഥിരമായി ലഹരി ഉപയോഗിക്കുന്ന ആളാണെന്ന് നാട്ടുകാര്‍ പൊലിസിനെ അറിയിച്ചിട്ടുണ്ട്.
വേണുവിനെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. പൊലിസ് കേസെടുത്ത് അന്വേഷണം ആരംഭിച്ചു.