കല്‍പ്പറ്റ: ന്യൂനപക്ഷ ക്ഷേമ വകുപ്പ് ന്യൂനപക്ഷ വിഭാഗത്തില്‍പ്പെട്ട വിധവകള്‍ക്കായി എര്‍പ്പെടുത്തിയ ഇമ്പിച്ചി ബാവ ഭവനപദ്ധതി പ്രകാരം ജില്ലയില്‍ അനുവദിക്കപ്പെട്ട വീടുകളുടെ നിര്‍മാണം ഫെബ്രുവരി 28നകം പൂര്‍ത്തികരിക്കും.
ന്യൂനപക്ഷ ക്ഷേമ ഡയരക്ടറേറ്റിലെ ഇന്‍ഫര്‍മേഷന്‍ കം റിസര്‍ച്ച് ഓഫിസര്‍ എ. മുഹമ്മദ് അന്‍സാര്‍ അധ്യക്ഷതയില്‍ കലക്ടറേറ്റ് മെയിന്‍ ഹാളില്‍ ചേര്‍ന്ന യോഗത്തിലാണ് തീരുമാനം. ജില്ലയില്‍ 153 വീടുകളാണ് പദ്ധതി വഴി നിര്‍മിക്കുന്നത്.
ഭവന നിര്‍മാണത്തിനായി കരാറിലേര്‍പ്പെട്ട ഗുണഭോക്താക്കള്‍ വിവിധ കാരണങ്ങളാല്‍ നിര്‍മാണം പൂര്‍ത്തീകരിക്കാത്തതിനാല്‍ ഈ ഓരോ ഘട്ടങ്ങളിലെയും തുക അനുവദിക്കാന്‍ കഴിയാത്ത സാഹചര്യം നിലവിലുണ്ട്. ആയിരം സ്‌ക്വയര്‍ ഫീറ്റ് വരെ വിസ്തീര്‍ണത്തില്‍ നിര്‍മിക്കുന്ന വീടുകള്‍ക്ക് ആനുപാതികമായി രണ്ടു മുതല്‍ നാലു ലക്ഷം രൂപ വരെയാണ് ഗുണഭോക്താക്കള്‍ക്ക് നല്‍കുന്നുത്. ഫ്രെബ്രുവരി എട്ടിന് എം.എല്‍.എമാര്‍, പഞ്ചായത്ത് പ്രസിഡന്റുമാര്‍, കുടുംബശ്രീ, ലൈഫ് മിഷന്‍, യു.എന്‍.ഡി.പി, വിവിധ എന്‍.എസ്.എസ് യൂനിറ്റുകള്‍, സന്നദ്ധ സംഘടനകള്‍ തുടങ്ങിയവയുടെ നേതൃത്വത്തില്‍ ഗുണഭോക്താക്കളെ പങ്കെടുപ്പിച്ചുകൊണ്ട് ജില്ലാ കലക്ടറേറ്റില്‍ മീറ്റിങ് നടത്താനും യോഗത്തില്‍ തീരുമാനമായി. കോച്ചിങ് സെന്റര്‍ ഫോര്‍ മൈനോരിറ്റി യൂത്ത് പ്രിന്‍സിപ്പല്‍ യൂസഫ് ചെമ്പന്‍, എം. സെക്ഷന്‍ സീനിയര്‍ സൂപ്രണ്ട് സരിത സുധാകരന്‍, സെക്ഷന്‍ ക്ലര്‍ക്ക് അഫ്‌സ പങ്കെടുത്തു.