കൊല്‍ക്കത്ത: കൊല്‍ക്കത്തന്‍ കരുത്തരായ മോഹന്‍ ബഗാന്‍ ഐ ലീഗ് ജേതാക്കള്‍. ഇന്നലെ നടന്ന മത്സരത്തില്‍ ഐസ്വാള്‍ എഫ്.സിയെ എതിരില്ലാത്ത ഒരു ഗോളിന് തകര്‍ത്താണ് മോഹന്‍ ബഗാന്‍ നീണ്ട ഇടവേളക്ക് ശേഷം ഐ ലീഗ് കിരീടം സ്വന്തമാക്കിയത്.
നാലു മത്സരങ്ങള്‍ ലീഗില്‍ ബാക്കിയിരിക്കെ ആണ് മോഹന്‍ ബഗാന്‍ കിരീടം ഉറപ്പിച്ചത്. ഇന്നലെ നടന്ന മത്സരത്തില്‍ ഐസ്വാള്‍ എഫ്.സിയെ പരാജയപ്പെടുത്തിയതോടെ ബഗാന് 39 പോയിന്റായി. പിറകിലുള്ള മറ്റു ടീമുകള്‍ ഇനിയുള്ള എല്ലാ മത്സരത്തിലും ജയിച്ചാലും ഇനി ബഗാനൊപ്പമെത്താന്‍ സാധിക്കില്ല.
80ാം മിനുട്ടില്‍ ബാബ ദിവാരയാണ് ബഗാന് വേണ്ടി ഗോള്‍ നേടിയത്. തുടര്‍ച്ചയായ എട്ടാം മത്സരത്തിലാണ് ദിവാര ഗോള്‍ നേടുന്നത്. ഈ വിജയത്തോടെ 16 മത്സരങ്ങളില്‍ നിന്നാണ് ബഗാന്‍ 39 പോയന്റില്‍ എത്തിയത്. 2014-15 സീസണു ശേഷമുള്ള ബഗാന്റെ ആദ്യ ദേശീയ ലീഗ് കിരീടമാണ് ഇത്. ക്ലബ് ചരിത്രത്തിലെ അഞ്ചാം ദേശീയ ലീഗ് കിരീടം എന്ന നേട്ടത്തില്‍ ബഗാന്‍ ഇതോടെ എത്തി.
ഈ സീസണ്‍ കഴിഞ്ഞാല്‍ എ.ടി.കെ കൊല്‍ക്കത്തയുമായി ലയിക്കുന്നതിനാല്‍ ഇതിഹാസ ക്ലബായ ബഗാന് കിരീടവുമായി ചരിത്രത്തിന്റെ ഒരു വലിയ ഏട് അവസാനിപ്പിക്കാന്‍ ആയി എന്ന സന്തോഷവും ഈ കിരീടം നല്‍കും. അതേ സമയം എ.ടി.കെയും കിരീടത്തിനടുത്താണ് എത്തി നില്‍ക്കുന്നത്. ശനിയാഴ്ച ചെന്നൈയിനുമായിട്ടാണ് എ.ടി.കെയുടെ ഫൈനല്‍ പോരാട്ടം. അതിന് ശേഷം ബഗാനും എ.ടി.കെയും ലയിക്കാനാണ് തീരുമാനം. എ.ടി.കെ കൂടി കിരീടം സ്വന്തമാക്കിയില്‍ രണ്ട് ക്ലബുകള്‍ക്കും അത് ചരിത്ര നേട്ടമാകും.