കൊച്ചി: ഈ സാമ്പത്തിക വര്‍ഷം മുതല്‍ ജില്ലയിലെ നെല്ലുത്പാദനം വര്‍ധിപ്പിക്കുന്നതിനുള്ള പദ്ധതികള്‍ക്കു കൂടുതല്‍ പ്രാധാന്യം നല്‍കുമെന്നു ജില്ല പഞ്ചായത്ത് പ്രസിഡന്റ് ആശ സനല്‍ അറിയിച്ചു. ജില്ലാ പഞ്ചായത്ത് ഹാളില്‍ ജില്ല ഗ്രാമസഭ ഉദ്ഘാടനം ചെയ്യുകയായിരുന്നു അവര്‍.
പൊക്കാളി പോലെയുള്ള ജൈവ നെല്‍ക്കൃഷിക്കു കൂടുതല്‍ സഹായം നല്‍കാന്‍ തയാറാണെന്നു സംസ്ഥാന സര്‍ക്കാര്‍ അറിയിച്ചിട്ടുണ്ട്. ഇതുസംബന്ധിച്ചു ജില്ലാ കലക്ടര്‍ എം.ജി രാജമാണിക്യത്തിന്റെ അധ്യക്ഷതയില്‍ ചേര്‍ന്ന യോഗവിവരങ്ങള്‍ പ്രസിഡന്റ് വിവരിച്ചു.
 ഈ സാഹചര്യത്തില്‍ ഗ്രാമ, ബ്ലോക്ക് പഞ്ചായത്തുകള്‍  ഉണര്‍ന്നു പ്രവര്‍ത്തിക്കണം. ജില്ലയിലെ ഭിന്നശേഷിക്കാര്‍ക്ക് മുച്ചക്ര വാഹനം നല്‍കുന്ന പദ്ധതിയും തുടരും. മുമ്പ് ലഭിച്ചവര്‍ക്ക് വീണ്ടും ലഭിക്കുന്ന സാഹചര്യം ഒഴിവാക്കണം. ഇതിനായി മെഡിക്കല്‍ ക്യാംപുകള്‍ സംഘടിപ്പിക്കും.
കുടുംബശ്രീയുടെ പ്രവര്‍ത്തനത്തിനൊപ്പം വനിതകള്‍ക്കായി കൂടുതല്‍ ക്ഷേമപദ്ധതികള്‍ നടപ്പിലാക്കാന്‍ പഞ്ചായത്തുകള്‍ ശ്രദ്ധിക്കണം. പശുവും കിടാവും, അംഗനശ്രീ ഓട്ടോറിക്ഷ, കരിങ്കോഴി പദ്ധതികള്‍ തുടര്‍ന്നും നടപ്പിലാക്കും.
 ജില്ലയില്‍ തെരുവു നായ, പേപ്പട്ടി ശല്യം വര്‍ധിക്കുന്ന സാഹചര്യത്തില്‍ ഇതിനെതിരായ നടപടികള്‍ക്കു ഗ്രാമപഞ്ചായത്തുകള്‍ക്കു സഹായം നല്‍കുമെന്ന് ജില്ല പഞ്ചായത്ത് പ്രസിഡന്റ് അറിയിച്ചു. എസ്.സി കുട്ടികള്‍ക്ക് വിദേശ പഠനം നല്‍കുന്ന പദ്ധതിയില്‍ ഒട്ടേറെ അപേക്ഷകള്‍ ലഭിച്ച സാഹചര്യത്തില്‍ എല്ലാവര്‍ക്കും അവസരം ലഭിക്കുക എന്ന ലക്ഷ്യത്തോടെ സഹായപരിധി 25 ലക്ഷമായി നിജപ്പെടുത്തിയിട്ടുണ്ടെന്നും ആശ സനല്‍ അറിയിച്ചു.
 യോഗത്തില്‍ വൈസ്പ്രസിഡന്റ് അബ്ദുള്‍ മുത്തലിബ് അധ്യക്ഷത വഹിച്ചു. ജില്ല പഞ്ചായത്തംഗം ഡോളി കുര്യാക്കോസ് സ്വാഗതം പറഞ്ഞു.  മുന്‍ പ്രസിഡന്റ് പി. എസ് ഷൈലയും മറ്റ് ജില്ലാ പഞ്ചായത്തംഗങ്ങളും യോഗത്തില്‍ പങ്കെടുത്തു. ബ്ലോക്ക് പഞ്ചായത്ത് അസോസിയേഷന്‍ വൈസ്പ്രസിഡന്റ് പി. ടി. പോള്‍, ഗ്രാമപഞ്ചായത്ത് അസോസിയേഷന്‍ പ്രസിഡന്റ് തുളസി ടീച്ചര്‍ എന്നിവര്‍ പ്രസംഗിച്ചു. തുടര്‍ന്ന് ഗ്രൂപ്പു തിരിഞ്ഞ് ചര്‍ച്ച നടത്തി അംഗങ്ങള്‍ നിര്‍ദേശങ്ങള്‍ ജില്ല പഞ്ചായത്തിനു സമര്‍പ്പിച്ചു.