പത്തനംതിട്ട: ജില്ലയില്‍ കൊവിഡ് ബാധിതരുമായി ഇടപഴകിയവരുടെ രക്തസാംപിള്‍ പരിശോധനാ ഫലം പുറത്തുവന്നതില്‍ അഞ്ചും നെഗറ്റിവ്. ഇത് ആശ്വാസം നല്‍കുന്നതാണെന്ന് ജില്ലാ കലക്ടര്‍ പി.ബി നൂഹ് പറഞ്ഞു. ഏഴ് സാംപികളുടെ റിസല്‍ട്ടുകള്‍ കൂടി ഇന്നു ലഭിക്കുമെന്ന് പ്രതീക്ഷിക്കുന്നു. മാര്‍ച്ച് 10ന് സാംപിള്‍ അയച്ച 12 പേരുടെ ഫലം നാളെ ലഭിക്കുമെന്നാണ് പ്രതീക്ഷ.

രോഗലക്ഷണങ്ങളോടെ 28 ആളുകളാണ് ആശുപത്രിയില്‍ ഐസൊലേഷനില്‍ കഴിയുന്നത്. ഇതില്‍ രോഗബാധ സ്ഥിരീകരിച്ചത് ഏഴ് കേസുകള്‍ മാത്രമാണ്. ജില്ലയില്‍ 900 ആളുകളാണ് ഇപ്പോള്‍ വീടുകളില്‍ നീരീക്ഷണത്തില്‍ കഴിയുന്നത്. നിരീക്ഷണത്തില്‍ കഴിയുന്നവര്‍ പുറത്തിറങ്ങിയാല്‍ അവര്‍ക്കെതിരേ പൊലിസ് കര്‍ശന നടപടി സ്വീകരിക്കും. വീടുകളില്‍ കഴിയുന്നവരെക്കുറിച്ചുള്ള കൃത്യമായ വിവരം പൊലിസ് തയ്യാറാക്കിയിട്ടുണ്ട്.

കൊവിഡ് സ്ഥിരീകരിച്ച രോഗികള്‍ സന്ദര്‍ശിച്ച സ്ഥലങ്ങളുടെ റൂട്ട് മാപ്പ് പുറത്തുവിട്ടതിനെ തുടര്‍ന്ന് 30പേര്‍ ആരോഗ്യ വകുപ്പ് അധികൃതരുമായി ബന്ധപ്പെട്ടിട്ടുണ്ട്. ഇതിനിടെ  കൊവിഡ് രോഗം മൂലമുളള മരണം കേരളത്തില്‍ ഉണ്ടാകില്ലെന്ന് ഉറപ്പ് പറയാനാകില്ലെന്ന് ആരോഗ്യമന്ത്രി കെ.കെ ശൈലജ പറഞ്ഞു.രോഗബാധക്കെതിരെ അതീവ സാഹസികമായിട്ടാണ് ആരോഗ്യവകുപ്പും സര്‍ക്കാര്‍ സംവിധാനങ്ങളും ഇടപെടുന്നത്. വിദേശത്ത് നിന്ന് എത്തുന്നവരെ വിമാനത്താവളത്തില്‍ പരിശോധിക്കുന്നതില്‍ വീഴ്ച ഉണ്ടായിട്ടില്ലെന്നും അവര്‍ പറഞ്ഞു.