തൊടുപുഴ: സംസ്ഥാന പോളി കലോത്സവം മഴയില്‍ കുതിര്‍ന്നു. വൈകിട്ട് പെയ്ത മഴയിലാണ് മത്സരം തടസപ്പെട്ടത്. പെണ്‍കുട്ടികളുടെ ഭരതനാട്യം രണ്ടാം വേദിയില്‍ നടക്കുമ്പോഴാണ് മഴയെത്തിയത്. ഒന്നും രണ്ടും വേദികള്‍ അല്‍ അസ്ഹര്‍ കോളജ്  ഗ്രൗണ്ടിലാണ് സജ്ജീകരിച്ചിരുന്നത്. ശക്തമായ കാറ്റും മഴയും വന്നതോടെ ഇവിടെ മത്സരം നിര്‍ത്തിവെച്ചു. രണ്ടാംവേദിയുടെ പന്തലിനുള്ളിലും വെള്ളംകയറി.
ഇവിടെ നടന്ന് കൊണ്ടിരുന്ന പെണ്‍കുട്ടികളുടെ ഭരതനാട്യം പാതി വഴിയില്‍ നിര്‍ത്തി. നാല്‍പത് മത്സരാര്‍ഥികള്‍ ഉള്ളതില്‍ പതിമൂന്ന് പേര്‍ വേദിയിലെത്തിക്കഴിഞ്ഞായിരുന്ന മഴ. ഇതിനു ശേഷം കുച്ചുപ്പുടിയും ഇതേ വേദിയിലാണ് നടക്കേണ്ടിയിരുന്നത്.
മഴ പെയ്തപ്പോള്‍ മുഖ്യവേദിയില്‍ മത്സരം നിലച്ചിരുന്നു. ഇവിടെ നടക്കേണ്ട കഥകളി മത്സരം മത്സരാര്‍ഥികളുടെ അസാന്നിധ്യം മൂലം ഉപേക്ഷിച്ചു. എഴുപത്തിനാല് പോളിടെക്‌നിക്  കോളജുകളില്‍ നിന്നായി ആകെ രണ്ട് പേര്‍ മാത്രമാണ് പേര് രജിസ്റ്റര്‍ ചെയ്തത്.ഇതില്‍ ഒരാള്‍ക്ക് സമയത്ത് എത്തിപ്പെടാന്‍ സാധിച്ചില്ല. മറ്റൊരു മത്സരാര്‍ഥി കാലിന് പരുക്ക് മൂലം മത്സരിച്ചില്ല. മിക്ക മത്സരങ്ങളിലും പ്രതീക്ഷിച്ചത്ര പങ്കാളിത്തം ഉണ്ടായില്ല. ആകെ ആറ് ഇനങ്ങളിലെ ഫലമാണ് പുറത്തുവന്നത്.
ആദ്യ ദിനത്തെ ആറ് ഇനങ്ങളിലെ മത്സര ഫലങ്ങള്‍ (ഒന്നാം സ്ഥാനം )
ചാക്യാര്‍കൂത്ത് - ബോവാസ് ജോയ്‌സ് ഗവ.പോളിടെക്‌നിക് കോളജ് പെരുമ്പാവൂര്‍
ഇംഗ്ലിഷ് പ്രസംഗം -  നേഹാ തദേവൂസ് വുമന്‍സ് പോളിടെക്‌നിക് കോളജ് കളമശ്ശേരി
മലയാളം പ്രസംഗം - അമല്‍ റോയി മോഡല്‍ പോളിടെക്‌നിക് കോളജ് കളത്തുംകര തൃശൂര്‍
മോഹിനിയാട്ടം (പെണ്‍) അതുല്യ പി.എം ഗവ.പോളിടെക്‌നിക് കോളജ് പെരിന്തല്‍മണ്ണ .
ഓട്ടന്‍തുള്ളല്‍  (പെണ്‍) ഒന്നാം സമ്മാനം രണ്ട് പേര്‍ പങ്കിട്ടു.ശ്രീലക്ഷ്മി റ്റി.പി മഹാരാജാസ് ടെക്‌നിക്കല്‍ ഇന്‍സ്റ്റിറ്റൂട്ട് തൃശൂര്‍ ,ഐശ്വര്യ എം. മോഡല്‍ പോളിടെക്‌നിക് കോളജ് കളത്തുംകര തൃശൂര്‍
ഓട്ടന്‍തുള്ളല്‍ (ആണ്‍) അനിരുദ്ധ് മാധവ് കെ.എസ് (എസ്.എസ്.എം പോളിടെക്‌നിക് കോളജ് തിരൂര്‍)