കെയ്‌റോ: കോക്പിറ്റ് വോയ്‌സ് റെക്കോര്‍ഡര്‍ കണ്ടെടുത്തതിനു പിന്നാലെ മധ്യധരണ്യാഴിയില്‍ തകര്‍ന്ന ഈജിപ്ത് എയറിന്റെ ബ്ലാക്‌ബോക്‌സും ലഭിച്ചു. കഴിഞ്ഞ ദിവസമാണ് കോക്പിറ്റ് വോയ്‌സ് റെക്കോര്‍ഡര്‍ ലഭിച്ചത്. മേഖലയില്‍ തെരച്ചില്‍ നടത്തുന്ന ജോണ്‍ ലെത്ബ്രിഡ്ജ് എന്ന കപ്പലിനാണ് ബ്ലാക് ബോക്‌സ് ലഭിച്ചതെന്ന് ഈജിപ്ഷ്യന്‍ അധികൃതര്‍ പറഞ്ഞു. വിമാനദുരന്തത്തില്‍ 66 പേരാണു കൊല്ലപ്പെട്ടത്.
തകര്‍ന്ന നിലയിലാണ് കോക്പിറ്റ് വോയ്‌സ് റെക്കോര്‍ഡര്‍ ലഭിച്ചത്. ഇതിലെ വിവരങ്ങള്‍ ലഭിക്കുമോയെന്ന പരിശോധന നടത്തുന്നുണ്ട്. കഴിഞ്ഞ ആഴ്ച തെരച്ചിലില്‍ പങ്കെടുത്ത കപ്പലിനാണ് ബ്ലാക് ബോക്‌സ് ലഭിച്ചത്. സര്‍ക്കാര്‍ തിരച്ചിലിനായി വാടകയ്‌ക്കെടുത്തതാണ് ഈ കപ്പല്‍. റെക്കോര്‍ഡറിന്റെ മെമ്മറി ലഭ്യമാക്കാനായാല്‍ വിമാനം തകരാനിടയാക്കിയ സാഹചര്യം കണ്ടെത്താനാകും. മധ്യധരണ്യാഴിയുടെ അടിത്തട്ടില്‍ ഈജിപ്ത് വിമാനത്തിന്റെ ഭാഗങ്ങള്‍ ആഴക്കടല്‍ റോബോട്ട് കണ്ടെത്തിയിരുന്നു. കഴിഞ്ഞ ജൂണ്‍ ഒന്നിന് ബ്ലോക്‌ബോക്‌സ് പുറപ്പെടുവിക്കുന്ന സിഗ്‌നല്‍ തിരച്ചില്‍ നടത്തുന്ന കപ്പല്‍ പിടിച്ചെടുത്തിരുന്നു.