തലശ്ശേരി: തലശ്ശേരി പുതിയബസ്റ്റാന്‍ഡില്‍ നിന്ന് സംഗമം ജങ്ഷന്‍ വരെയുള്ള റോഡ് പ്രവൃത്തി പൂര്‍ത്തിയാകാത്തതിനാല്‍ ഗതാഗതക്കുരുക്കേറുന്നു. ഒന്നരമാസം കഴിഞ്ഞിട്ടും റോഡിന്റെ പ്രവൃത്തി ഇതുവരെ പുരോഗമിച്ചിട്ടില്ല. റെയ്ല്‍വേ മേല്‍പ്പാലം വഴിയുള്ള ഗതാഗതം താല്‍ക്കാലികമായി നിരോധിച്ചതോടെ ഇതുവഴിയുള്ള ഗതാഗതകുരുക്ക് രൂക്ഷമാണ്. എത്രയും പെട്ടെന്ന് റോഡ് പ്രവൃത്തി തീര്‍ക്കണമെന്നാണ് യാത്രക്കാരുടെയും സമീപത്തുള്ള വ്യാപാരികളുടേയും ആവശ്യം. റോഡിന്റെ പകുതി ഭാഗം പ്രവൃത്തിയും മറുഭാഗം വാഹനങ്ങള്‍ കടന്നു പോകുകയും ചെയ്യുന്നുണ്ട്. നിരവധി വാഹനങ്ങള്‍ കടന്നു പോകുന്നതോടെ ഗതാഗതകുരുക്ക് ഇവിടെ ഇരട്ടിക്കുകയാണ്. പൊടി ശല്യവും രൂക്ഷമാണ്. നേരത്തെ റോഡ് പ്രവൃത്തി ആരംഭിക്കണമെന്ന് അധികൃതര്‍ അറിയിച്ചെങ്കിലും വൈകിയാണ് ഇവിടെ പ്രവൃത്തി ആരംഭിച്ചത്. പ്രവൃത്തി പൂര്‍ത്തിയാകാന്‍ മാസങ്ങള്‍ ഇനിയും വേണ്ടി വരുമെന്ന അവസ്ഥയാണ്.