ലണ്ടന്‍: മാഞ്ചസ്റ്റര്‍ യുനൈറ്റഡ് താരം മറോനെ ഫെല്ലിനെ ടീം വിട്ട് ചൈനീസ് ക്ലബില്‍ ചേര്‍ന്നു. ചൈനീസ് ലീഗില്‍ കളിക്കുന്ന ഷാങ്‌ദോങ് ലെനങ്ങുമായിട്ടാണ് 31 കാരനായ ഫെല്ലിനി കരാറിലെത്തിയിട്ടുള്ളത്. 2013ല്‍ എവര്‍ട്ടണില്‍ നിന്ന് ഓള്‍ഡ് ട്രാഫോര്‍ഡിലെത്തിയ ഫെല്ലിനി യുനൈറ്റഡിനായി 177 മത്സരങ്ങള്‍ കളിച്ചിട്ടുണ്ട്. 22 ഗോളുകളും യുനൈറ്റഡിന്റെ പ്രതിരോധ താരം സ്വന്തമാക്കി.

യുനൈറ്റഡില്‍ താരത്തിന്റെ സര്‍വീസിന് നന്ദിയുണ്ടെന്നും നല്ലൊരു ഭാവി ആശംസിക്കുന്നെന്നും യുനൈറ്റഡ് അധികൃതര്‍ ട്വിറ്ററില്‍ കുറിച്ചു. മൗറീഞ്ഞോയുടെ കീഴിലായിരുന്നപ്പോള്‍ ഫെല്ലിനി 2020വരെ യുനൈറ്റഡുമായി കരാറുണ്ടാക്കിയിരുന്നെങ്കിലും മൗറീഞ്ഞോ മാറിയതോടെ ഫെല്ലിനിയുടെ കഷ്ടകാലം തുടങ്ങുകയായിരുന്നു.
പുതിയ പരിശീലകനായി എത്തിയ സോല്‍ഷ്യാര്‍ക്ക് കീഴിലെ ഏഴ് മത്സരങ്ങളിലും അവസാന സബ്റ്റിയുട്ടായിട്ടായിരുന്നു ഫെല്ലിനിയുടെ സ്ഥാനം. ഇതാണ് താരത്തെ ക്ലബ് മാറാന്‍ പ്രേരിപ്പിച്ചതെന്ന് റിപ്പോര്‍ട്ടുകളുണ്ട്.