കൊണ്ടോട്ടി: കരിപ്പൂര്‍ വിമാനത്താവളത്തില്‍ നിന്നും ദുബൈയിലേക്കുള്ള ഫ്‌ളൈ ദുബൈ വിമാന കമ്പനിയുടെ സര്‍വിസുകള്‍ക്ക് തുടക്കമായി. വെള്ളിയാഴ്ച രാത്രി 8.20ന് ദുബൈയില്‍ നിന്നും പുറപ്പെട്ട വിമാനം ശനിയാഴ്ച പുലര്‍ച്ചെ 1.45നാണ് കരിപ്പൂരിലെത്തിയത്.
ആദ്യ വിമാനത്തെ വാട്ടര്‍ സല്യൂട്ട് നല്‍കിയാണ് കരിപ്പൂരില്‍ സ്വീകരിച്ചത്. ആദ്യവിമാനത്തില്‍ 178 യാത്രക്കാരായിരുന്നു ഉണ്ടായിരുന്നത്. വിമാനം പിന്നീട് പുലര്‍ച്ചെ 3.05ന് ദുബൈയിലേക്ക് തന്നെ തിരിച്ച് പോയി. ചൊവ്വ, വ്യാഴം, ശനി ദിവസങ്ങളിലും കരിപ്പൂരില്‍ നിന്ന് ദുബൈയിലേക്കും തിങ്കള്‍, ബുധന്‍, വെള്ളി ദിവസങ്ങളില്‍ ദുബൈയില്‍ നിന്ന് കരിപ്പൂരിലേക്കുമാണ് ഫ്‌ളൈ ദുബൈ വിമാന സര്‍വിസ് ഷെഡ്യൂള്‍ ചെയ്തിരിക്കുന്നത്. കരിപ്പൂരില്‍ നിന്നും ദുബൈയിലേക്ക് സര്‍വിസ് നടത്തുന്ന അഞ്ചാമത്തെ വിമാനകമ്പനിയാണ് ഫ്‌ളൈ ദുബൈ.

ഈമാസം അഞ്ചു മുതല്‍ ജിദ്ദയിലേക്ക് സഊദി എയര്‍ലൈന്‍സിന്റെ രണ്ട് അധിക സര്‍വിസുകളും കരിപ്പൂരില്‍ നിന്നും ആരംഭിക്കുന്നുണ്ട്. ചൊവ്വ,വ്യാഴം ദിവസങ്ങളിലായിരിക്കും ജിദ്ദയിലേക്ക് സഊദിയുടെ അധിക സര്‍വിസ്. ഇതോടെ ജിദ്ദയിലേക്ക് സഊദിയുടെ സര്‍വിസ് ഏഴായി വര്‍ധിക്കും. നിലവില്‍ ജിദ്ദയിലേക്ക് അഞ്ചും റിയാദിലേക്ക് രണ്ട് സര്‍വിസുകളുമാണുള്ളത്.