തിരുവനന്തപുരം: ഭീതി വിതച്ച് കൊവിഡ് രാജ്യത്ത് പടരുമ്പോള്‍ എല്ലാ സ്‌കൂളുകളും സര്‍വകലാശാലകളും അടക്കാനും പരീക്ഷകള്‍ മാറ്റിവെയ്ക്കാനും കേന്ദ്ര സര്‍ക്കാര്‍ നിര്‍ദേശം നല്‍കിയിട്ടുണ്ടെങ്കിലും കേരളത്തിലെ സര്‍വകലാശാലാ പരീക്ഷകള്‍ക്കും എസ്.എസ്.എല്‍.സി, പ്ലസ്ടു പരീക്ഷകള്‍ക്കും മാറ്റമില്ല. നിലവില്‍ എസ്.എസ്.എല്‍.സി. പ്ലസ് വണ്‍. പ്ലസ്ടു, വി.എച്ച്.എസ്.ഇ പരീക്ഷകള്‍ മാറ്റമില്ലാതെ തുടരുമെന്ന് പൊതു വിദ്യാഭ്യാസ ഡയറക്ടര്‍ അറിയിച്ചു.

കൊവിഡിന്റെ പശ്ചാത്തലത്തിലാണ് കേന്ദ്രസര്‍ക്കാറിന്റെ പുതിയ തീരുമാനം. പരീക്ഷകള്‍ മാര്‍ച്ച് 31നു ശേഷം മാത്രം നടത്തിയാല്‍ മതിയെന്നാണ് അറിയിപ്പില്‍ പറയുന്നത്. എല്ലാ സര്‍വകലാശാലകളുടെ പരീക്ഷകളും മാറ്റിവെക്കാനും നിര്‍ദേശിച്ചിട്ടുണ്ട്. രാജ്യത്തെ സി.ബി.എസ്.ഇ സ്‌കൂളുകളില്‍ നിലവില്‍ നടക്കുന്ന എല്ലാ പരീക്ഷകളും മാറ്റിവെക്കും. അതേ സമയം കേരളത്തിലെ സി.ബി.എസ്.ഇ ഒഴികെയുള്ള പരീക്ഷകളെല്ലാം നടക്കും.