ന്യൂഡല്‍ഹി: കലിയുഗത്തില്‍ വൈറസുകള്‍ക്കെതിരേ പോരാടാന്‍ മനുഷ്യനു കഴിയില്ലെന്നു സുപ്രിം കോടതി ജഡ്ജി അരുണ്‍ മിശ്ര. മനുഷ്യന്റെ ദൗര്‍ബല്യം നോക്കൂ. നിങ്ങള്‍ എന്തും ചെയ്യാന്‍ ശക്തനാണ്. എല്ലാ തരത്തിലുമുള്ള ആയുധങ്ങള്‍ വികസിപ്പിച്ചിട്ടുണ്ട്. എന്നാല്‍, ഒരു വൈറസിനോടു പോരാടാന്‍ കഴിയില്ല. നമ്മുടെ അവസ്ഥയില്‍നിന്നു വേണം അതിനെതിരേ പോരാടാനെന്നും അദ്ദേഹം പറഞ്ഞു.
കൊറോണ വ്യാപനത്തെ തുടര്‍ന്ന് സുപ്രിം കോടതിയില്‍ ഏര്‍പ്പെടുത്തിയ നിയന്ത്രണം അടിയന്തര പ്രാധാന്യമുള്ള കേസുകള്‍ പരിഗണിക്കുന്നതിനു തടസമാകുന്നുണ്ടെന്ന് അഭിഭാഷകര്‍ ചൂണ്ടിക്കാട്ടിയപ്പോഴായിരുന്നു മിശ്രയുടെ പ്രതികരണം. വൈറസിനെതിരേ സര്‍ക്കാര്‍ മാത്രമല്ല, എല്ലാവരും പൊരുതുകയാണ് പരിഹാരം. നിങ്ങള്‍ക്കു വേണ്ടി നിങ്ങള്‍ തന്നെ പൊരുതണം. മറ്റൊരാളെ പൊരുതാന്‍ ഏല്‍പ്പിക്കരുതെന്നും മിശ്ര പറഞ്ഞു. നേരത്തെ ജസ്റ്റിസ് അരുണ്‍ മിശ്ര പ്രധാനമന്ത്രി നരേന്ദ്രമോദിയെ പ്രകീര്‍ത്തിച്ചതു വിവാദമായിരുന്നു.