ജിദ്ദ: സഊദി അറേബ്യയില്‍ കഴിയുന്ന വിസിറ്റിംഗ് വിസക്കാര്‍ക്ക് ഓണ്‍ലൈന്‍ വഴി കാലാവധി ദീര്‍ഘിപ്പിക്കാമെന്ന് പാസ്‌പോര്‍ട്ട് (ജവാസാത്ത്) ഡിപ്പാര്‍്ട്ട്‌മെന്റ് അറിയിച്ചു. ഓണ്‍ലൈന്‍ സേവന പ്ലാറ്റ്‌ഫോമുകളായ അബ്ശിറും മുഖീമും വഴിയാണ് ദീര്‍ഘിപ്പിക്കുന്നതിന് അവസരമൊരുക്കിയിരിക്കുന്നത്. നാഷണല്‍ ഇന്‍ഫര്‍മേഷന്‍ സെന്ററുമായി സഹകരിച്ചാണ് ഈ നടപടി. വിസിറ്റ് വിസക്കാര്‍ക്ക് സൗദിയില്‍ ഒരേ സമയം തങ്ങാവുന്ന പരമാവധി ദിവസം 180 ആണ്. ഇതില്‍ കൂടുതല്‍ ആവാന്‍ പാടില്ലെന്ന് വ്യവസ്ഥയുണ്ട്. എന്നാല്‍ പുതിയ സാഹചര്യത്തില്‍ അതില്‍ കൂടുതല്‍ ദിവസം തങ്ങിയവരുടെ വിസകളും ദീര്‍ഘിപ്പിച്ചു നല്‍കും. ഇതിന് ജവാസാത്ത് ഡയറക്ടറേറ്റുകളെ നേരിട്ട് സമീപിക്കണമെനന്നായിരുന്നു നേരത്തെയുള്ള അറിയിപ്പ്. ഇനിയിപ്പോള്‍ അതിന്റെ ആവശ്യമില്ല, ഓണ്‍ലൈന്‍ വഴി ദീര്‍ഘിപ്പിക്കാം. കാലാവധി അവസാനിക്കുന്നതിന് ഏഴു ദിവസത്തിനുള്ളിലായാണ് ഓണ്‍ലൈന്‍ വഴി വിസകള്‍ ദീര്‍ഘിപ്പിക്കേണ്ടത്. വിസയിലെ കാലാവധി കഴിഞ്ഞ് മൂന്നു ദിവസം പിന്നിടാനും പാടില്ല.