റിയാദ്: സൈബര്‍ കുറ്റകൃത്യം തടയുന്നതിന് ചൈനയുമായി കരാര്‍ ഒപ്പു വെക്കാന്‍ സഊദി മന്ത്രി സഭാ തീരുമാനം. സല്‍മാന്‍ രാജാവിന്റെ അധ്യക്ഷതയില്‍ റിയാദിലെ യമാമഃ രാജകൊട്ടാരത്തില്‍ ചേര്‍ന്ന മന്ത്രി സഭാ യോഗമാണ് ചൈനയുമായി സഹകരണം ശക്തമാക്കുന്നതിന്റെ ഭാഗമായി കരാര്‍ ഒപ്പു വെക്കാന്‍ തീരുമാനിച്ചത്. സൈബര്‍ കുറ്റ കൃത്യം തടയുന്നതിന് കരാറില്‍ ഏര്‍പ്പെടണമെന്ന ആഭ്യന്തര മന്ത്രാലയത്തിന്റെ പ്രത്യേക നിര്‍ദേശത്തെ തുടര്‍ന്നാന്ന് ഇക്കാര്യത്തില്‍ ചൈനയുമായി സഊദി സഹകരിക്കുന്നത്. ഇതിന്റെ മുന്നോടിയായി സഊദി ആഭ്യന്തര മന്ത്രി അമീര്‍ അബ്ദുല്‍ അസീസ് ബിന്‍ സഊദ് ചൈനീസ് അധികൃതരുമായി ചര്‍ച്ചകള്‍ നടത്തും. സൈബര്‍ കുറ്റകൃത്യം തടയുന്നതിന് നേരത്തെ ഇന്ത്യയുമായും സഊദി കരാറില്‍ ഏര്‍പ്പെട്ടിരുന്നു.

നികുതി വെട്ടിപ്പ് തടയാനും ഇരട്ട നികുതി ഒഴിവാക്കാനുമായി അയല്‍രാജ്യമായ യു.എ.ഇ യുമായും കരാറില്‍ ഒപ്പുന്നു വെക്കാനും മന്ത്രി സഭ അംഗീകാരം നല്‍കിയിട്ടുണ്ട്. സഊദി ധനകാര്യ മന്ത്രിയും സകാത്ത് ടാക്‌സ് അതോറിറ്റി മേധാവിയുമായ മുഹമ്മദ് അല്‍ ജദ്ആന്‍ സമര്‍പ്പിച്ച കരടിന് മന്ത്രിസഭ അംഗീകാരം നല്‍കിയാണിത്.