നൈസ്: യൂറോ കപ്പില്‍ ഹാട്രിക് കിരീടം ലക്ഷ്യമിടുന്ന നിലവിലെ ചാംപ്യന്മാരായ സ്‌പെയിന്‍ തുര്‍ക്കിയെ മറുപടിയില്ലാത്ത മൂന്നു ഗോളുകള്‍ക്കു തകര്‍ത്ത് പ്രീ ക്വാര്‍ട്ടറില്‍ സ്ഥാനമുറപ്പിച്ചു. ഈ യൂറോയില്‍ ആദ്യമായാണ് ഒരു ടീം രണ്ടില്‍ കൂടുതല്‍ ഗോളുകള്‍ നേടുന്നത്. ഗ്രൂപ്പ് ഡിയിലെ ആവേശകരമായ മത്സരത്തില്‍ ആല്‍വരോ മൊറാറ്റ (34, 48) ഇരട്ട ഗോളും നൊലിറ്റൊ(37) ഒരു ഗോളും നേടി. ആദ്യ മത്സരത്തില്‍ സ്‌പെയിന്‍ ചെക്ക് റിപ്പബ്ലിക്കിനെ പരാജയപ്പെടുത്തിയും തുര്‍ക്കി ക്രൊയേഷ്യയോട് പരാജയപ്പെട്ടുമാണ് രണ്ടാം പോരിനിറങ്ങിയത്. 

പതിവിനു വിപരീതമായി ടിക്കി- ടാക്ക തന്ത്രത്തിനു പകരം വിങുകളിലൂടെയുള്ള ആക്രമണത്തിനും നീളന്‍ പാസുകളുമായും ഇടയ്ക്കു മാത്രം കുറിയ പാസുകളും നല്‍കി സ്‌പെയിന്‍ ആത്മവിശ്വാസത്തോടെ കളിച്ചു. സമ്പൂര്‍ണ ആധ്യപത്യവുമായി സ്പാനിഷ് നിര മൈതാനത്ത് നിറഞ്ഞപ്പോള്‍ തുര്‍ക്കി താരങ്ങള്‍ കാഴ്ചക്കാരായി. ഗോള്‍ മടക്കാന്‍ അപൂര്‍വ അവസരങ്ങളില്‍ അവര്‍ ശ്രമം നടത്തിയെങ്കിലും അലക്ഷ്യമായ ഷോട്ടുകളാല്‍ തുര്‍ക്കിഷ് താരങ്ങള്‍ അവസരങ്ങള്‍ കളഞ്ഞുകുളിച്ചു.
മധ്യ നിരയില്‍ ബുസ്‌കറ്റ്‌സ്- ഇനിയെസ്റ്റ ദ്വയവും മുന്നേറ്റത്തില്‍ മൊറാറ്റ, നൊലിറ്റൊ സഖ്യവും മിന്നും പ്രകടനം പുറത്തെടുത്തു. വിങുകളിലൂടെയുള്ള ആക്രമണത്തിനും ഇത്തവണ സ്പാനിഷ് നിര പ്രാധാന്യം നല്‍കി. ഇരു വിങുകളിലായി ജോര്‍ദി ആല്‍ബയും യുവാന്‍ഫ്രാനും അധ്വാനിച്ചു കളിച്ചു. തുടക്കം മുതല്‍ തുര്‍ക്കിയുടെ ഗോള്‍ മുഖത്ത് സമ്മര്‍ദം ചെലുത്തിയ സ്‌പെയിന്‍ 34ാം മിനുട്ടില്‍ ആദ്യ ഗോള്‍ നേടി. നൊലിറ്റൊ തൊടുത്ത ഷോട്ട് ഹെഡ്ഡറിലൂടെ മൊറാറ്റ സുന്ദരമായി വലയില്‍ എത്തിച്ചു. തൊട്ടു പിന്നാലെ 37ാം മിനുട്ടില്‍ നൊലിലിറ്റൊയിലൂടെ സ്‌പെയിന്‍ രണ്ടാമത്തെ ഗോള്‍ നേടി. ഫാബ്രിഗസ് ഉയര്‍ത്തിയടിച്ച പന്ത് ക്ലിയര്‍ ചെയ്യാന്‍ ശ്രമിച്ച തുര്‍ക്കി താരം മെഹ്മത് തൊപാലിനു പിഴച്ചപ്പോള്‍ ബോക്‌സിലുണ്ടായിരുന്ന നൊലിറ്റൊ പന്തിനെ ലക്ഷ്യം തെറ്റാതെ വലയിലാക്കി.
രണ്ടാം പകുതിയിലും സ്‌പെയിനിന്റെ കൈയിലായിരുന്നു കളി. 48ാം മിനുട്ടില്‍ മൊറാറ്റ സ്‌പെയിനിനു മൂന്നാം ഗോള്‍ സമ്മാനിച്ചു. മികച്ച ടീം ഗെയിനൊടുവിലാണ് ഗോള്‍ വീണത്. ഇനിയെസ്റ്റ നല്‍കിയ പാസ് സ്വീകരിച്ച് ജോര്‍ദി ആല്‍ബ അതു മൊറാറ്റയ്ക്ക് മറിച്ചു. പഴുതുകളനുവദിക്കാതെ യുവന്റസ് താരം തന്റെ രണ്ടാം ഗോളിലൂടെ സ്പാനിഷ് ലീഡ് മൂന്നാക്കിയുയര്‍ത്തി. മൂന്നു ഗോള്‍ വഴങ്ങിയതോടെ മുന്നേറി കളിക്കാന്‍ ശ്രമിച്ച തുര്‍ക്കിക്ക് അവസാന നിമിഷങ്ങളിലും മികച്ച അവസരങ്ങള്‍ ലഭിച്ചെങ്കിലും ഗോളാക്കാന്‍ സാധിച്ചില്ല. യൂനുസ് മാലിയും ഒല്‍കായ് സഹനും സുവര്‍ണാവസരങ്ങള്‍ പാഴാക്കി. സ്പാനിഷ് ഗോള്‍ കീപ്പര്‍ ഡേവിഡ് ജിയ തുടര്‍ച്ചയായി പന്ത്രണ്ടാം മത്സരത്തിലും ഗോള്‍ വഴങ്ങാതെ നിലകൊണ്ടു.