ഉരുവച്ചാല്‍: കരാറുകാരുടെ അനാസ്ഥ കാരണം പാതിവഴിയില്‍ നിലച്ച തലശ്ശേരി -വളവുപാററോഡ് നിര്‍മാണത്തിന് വീണ്ടും ജീവന്‍ വച്ചു. തലശ്ശേരി മുതല്‍ മട്ടന്നൂര്‍ വരെയുള്ള കള്‍വര്‍ട്ടിന്റെ നിര്‍മാണമാണ് ആദ്യഘട്ടത്തില്‍ നടക്കുന്നത്. ഈ റോഡ് കടന്നുപോവുന്ന സ്ഥലങ്ങളിലെ നാലു പാലങ്ങളുടെ നിര്‍മാണവും നടക്കുന്നുണ്ട്. പാതിവഴിയില്‍ നിര്‍ത്തിവച്ച മെരുവമ്പായി പാലത്തിന്റെ നിര്‍മാണ പ്രവൃത്തിയാണ് നടക്കുന്നത്. കളറോഡ്, കരേറ്റ, മെരുമ്പായി, ചിറക്കര തുടങ്ങിയ പാലങ്ങളാണ് പുതുതായി നിര്‍മിക്കേണ്ടത്. ലോകബാങ്കിന്റെ സഹായത്തോടെ അഞ്ചുവര്‍ഷം മുന്‍പാണ് നിര്‍മാണ പ്രവൃത്തിക്ക് കരാര്‍ നല്‍കിയത്. കരാറുകാരന്‍ പ്രവൃത്തി ആരംഭിച്ചെങ്കിലും പാതിവഴിയില്‍ ഉപേക്ഷിച്ച് പോവുകയായിരുന്നു. ഇതിനെതുടര്‍ന്ന് സര്‍ക്കാര്‍ പുതിയ ടെന്‍ഡര്‍ വിളിച്ച് മറ്റൊരു കമ്പനിക്ക് കരാര്‍ നല്‍കുകയാണ് ചെയ്തത്. തലശ്ശേരി മുതല്‍ സംസ്ഥാന അതിര്‍ത്തി പ്രദേശമായ വളവുപാറ വരെയാണ് പുതിയ റോഡ് നിര്‍മിക്കുന്നത്. തലശ്ശേരി മുതല്‍ കളറോഡ് വരെ കരാര്‍ ഒരു കമ്പനിക്കും കളറോഡ് മുതല്‍ വളവുപാറ വരെ ഇ.കെ.എന്‍ എന്ന കമ്പനിക്കുമാണ് കരാര്‍ നല്‍കിയത്. കള റോഡ് മുതല്‍ ഇരിട്ടിവരെ നിര്‍മാണം പകുതിപൂര്‍ത്തിയായി.