ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മാഞ്ചസ്റ്റര്‍ ടീമുകള്‍ക്ക് വിജയം. മാഞ്ചസ്റ്റര്‍ സിറ്റി എവേ പോരാട്ടത്തില്‍ ഒന്നിനെതിരേ നാല് ഗോളുകള്‍ക്ക് വെസ്റ്റ് ഹാം യുനൈറ്റഡിനെ പരാജയപ്പെടുത്തി. സ്വന്തം തട്ടകത്തില്‍ കരുത്തരായ ആഴ്‌സനലിനെ നേരിട്ട മാഞ്ചസ്റ്റര്‍ യുനൈറ്റഡ് അവസാന സെക്കന്‍ഡുകളില്‍ നേടിയ ഗോളില്‍ 2-1ന് വിജയം സ്വന്തമാക്കുകയായിരുന്നു.
ലിറോയ് സനെ, ഗബ്രിയേല്‍ ജീസസ്, ഫെര്‍ണാണ്ടീഞ്ഞോ എന്നിവര്‍ സിറ്റിക്കായി വല ചലിപ്പിച്ചു. ഒരു ഗോള്‍ വെസ്റ്റ് ഹാം താരം പാബ്ലോ സബലേറ്റ സെല്‍ഫിലൂടെ അവര്‍ക്ക് ദാനമായും നല്‍കി.
ആദ്യ പകുതിയില്‍ ഒരു ഗോളിന് മുന്നില്‍ നിന്ന മാഞ്ചസ്റ്റര്‍ യുനൈറ്റഡിനെ രണ്ടാം പകുതിയില്‍ ഒപ്പം പിടിക്കാന്‍ ആഴ്‌സനലിന് സാധിച്ചു. 16ാം മിനുട്ടില്‍ പോള്‍ പോഗ്ബയാണ് യുനൈറ്റഡിന് ലീഡൊരുക്കിയത്. ആഴ്‌സനലിനായി മിഖിതാര്യന്‍ 51ാം മിനുട്ടില്‍ തന്റെ പഴയ ക്ലബിനെതിരേ സമനില ഗോള്‍ നേടി. എന്നാല്‍ കളി സമനിലയില്‍ അവസാനിക്കുമെന്ന പ്രതീതി നില്‍ക്കേ ഇഞ്ച്വറി ടൈമില്‍ ഫെല്ലെയ്‌നി യുനൈറ്റഡിന് അപ്രതീക്ഷിത വിജയം സമ്മാനിക്കുകയായിരുന്നു.

റയലിനും അത്‌ലറ്റിക്കോയ്ക്കും ജയം

മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ റയല്‍ മാഡ്രിഡിനും അത്‌ലറ്റിക്കോ മാഡ്രിഡിനും ജയം. റയല്‍ ഒന്നിനെതിരേ രണ്ട് ഗോളുകള്‍ക്ക് ലെഗാനസിനെ പരാജയപ്പെടുത്തിയപ്പോള്‍ അത്‌ലറ്റിക്കോ മാഡ്രിഡ് 1-0ത്തിന് ഡിപോര്‍ടീവോ അലാവെസിനെയാണ് വീഴ്ത്തിയത്.
സൂപ്പര്‍ താരം ക്രിസ്റ്റ്യാനോ റൊണാള്‍ഡോ ഇല്ലാതെയും പ്രമുഖര്‍ക്കെല്ലാം ആദ്യ ഇലവനില്‍ ഇടം നല്‍കാതെയുമാണ് സിനദിന്‍ സിദാന്‍ ടീമിനെയിറക്കിയത്. ഗെരത് ബെയ്ല്‍ നായകന്റെ ആം ബാന്‍ഡുമായി കളിക്കാനിറങ്ങി എട്ടാം മിനുട്ടില്‍ തന്നെ ടീമിനെ മുന്നിലെത്തിച്ചു.
ആദ്യ പകുതി തീരാന്‍ നിമിഷങ്ങള്‍ മാത്രമുള്ളപ്പോള്‍ ബോര്‍ജയിലൂടെ റയല്‍ രണ്ടാം ഗോളും വലയിലാക്കി.
ഗോള്‍രഹിത സമനിലയില്‍ അവസാനിക്കുമെന്ന് പ്രതീക്ഷിക്കപ്പെട്ട മത്സരത്തിന്റെ 78ാം മിനുട്ടില്‍ ലഭിച്ച പെനാല്‍റ്റി വലയിലെത്തിച്ചാണ് അത്‌ലറ്റിക്കോ മാഡ്രിഡ് വിജയം പിടിച്ചത്. കിക്കെടുത്ത ഗെമയ്‌റോ ലക്ഷ്യം കണ്ടു.
മറ്റ് മത്സരങ്ങളില്‍ വിയ്യാറല്‍ സ്വന്തം തട്ടകത്തില്‍ സെല്‍റ്റ വിഗോയെ വീഴ്ത്തി. ഒന്നിനെതിരേ നാല് ഗോളുകള്‍ക്കാണ് വിയ്യാറലിന്റെ വിജയം. ഗെറ്റാഫെ- ജിറോണ പോരാട്ടം 1-1ന് സമനില.

മിലാന്‍: ഇറ്റാലിയന്‍ സീരി എയില്‍ ഇന്റര്‍ മിലാന്‍ അവരുടെ തട്ടകത്തില്‍ വീഴ്ത്തി യുവന്റസ് കിരീട പ്രതീക്ഷ സജീവമാക്കി നിര്‍ത്തി. രണ്ടിനെതിരേ മൂന്ന് ഗോളുകള്‍ക്കാണ് യുവന്റസ് വിജയിച്ചത്. 89ാം മിനുട്ടില്‍ ഹിഗ്വയ്‌നാണ് സമനിലയിലേക്ക് പോയ മത്സരം യുവന്റസിന് അനുകൂലമാക്കിയത്. മറ്റ് മത്സരങ്ങളില്‍ എ.സി മിലാന്‍ എവേ പോരാട്ടത്തില്‍ 2-1ന് ബോലോഗ്നയെ പരാജയപ്പെടുത്തി. റോമ സ്വന്തം തട്ടകത്തില്‍ ചീവോയെ 4-1ന് തുരത്തി.

ഏഴാം തവണയും സെല്‍റ്റിക്ക്

എഡിന്‍ബര്‍ഗ്: തുടര്‍ച്ചയായ ഏഴാം തവണയും സ്‌കോട്ടിഷ് പ്രീമിയര്‍ഷിപ്പില്‍ സെല്‍റ്റിക്ക് തന്നെ ചാംപ്യന്‍മാര്‍. കിരീട നിര്‍ണയ പോരാട്ടത്തില്‍ റെയ്‌ഞ്ചേഴ്‌സിനെ 5-0ത്തിന് കീഴടക്കിയാണ് അവര്‍ ജേതാക്കളായത്.