കോഴിക്കോട്: പ്രമുഖ നഗരങ്ങളില്‍ നടന്നുവരുന്ന ചിത്രലേലം മിഠായിത്തെരുവില്‍ ഒന്‍പതു മുതല്‍ ആരംഭിക്കും. തുടര്‍ന്ന് എല്ലാമാസവും രണ്ടാം ശനിയാഴ്ചകളില്‍ ചിത്രപ്രദര്‍ശനവും വില്‍പനയും ചിത്രലേലവും വൈകിട്ടു നടക്കും.
3.30 മുതല്‍ 6.30 വരെ ഹോട്ടല്‍ ആര്യഭവനു സമീപത്താണു പരിപാടി. ചിത്രകലയില്‍ പ്രാഗത്ഭ്യം നേടിയിട്ടും പല കലാകാരന്‍മാരും അംഗീകരിക്കപ്പെടുന്നില്ല. അവരെ പരിചയപ്പെടാന്‍ അവസരമൊരുക്കുകയും വിപണന സാധ്യതകളെക്കുറിച്ച് സാധാരണക്കാരില്‍ അവബോധമുണ്ടാക്കുകയുമാണു ലക്ഷ്യമാക്കുന്നതെന്ന് ഗുരുകുലം ആര്‍ട്ട് വില്ലേജ് ചിത്ര ശില്‍പ പഠനഗവേഷണ കേന്ദ്രം ഭാരവാഹി ഗുരുകുലം ബാബു അറിയിച്ചു. പരിപാടിയുടെ ഉദ്ഘാടനം ഒന്‍പതിന് വൈകിട്ട് 3.30ന് അസി. കലക്ടര്‍ കെ. അഞ്ജു ഉദ്ഘാടനം നിര്‍വഹിക്കും.