കൊണ്ടോട്ടി:നഗരസഭയിലെ 2018-19 വര്‍ഷത്തെ പദ്ധതി പ്രവൃത്തികളില്‍ ഉള്‍പ്പെടുത്തി 69 കുടുംബങ്ങള്‍ക്ക് കോഴിയും കൂടും നല്‍കും. ഒരു ഗുണഭോക്താവിന് 10,000 രൂപയുടെ പദ്ധതിയാണിത്. ഇതില്‍ ഗുണഭോക്താവ് 5000 രൂപ അടക്കുമ്പോള്‍ നഗരസഭ ശേഷിക്കുന്ന അയ്യായിരം നല്‍കും.
നഗരസഭയിലെ അങ്കണവാടികള്‍ക്ക് പാത്രങ്ങള്‍ സാമഗ്രികള്‍ വാങ്ങുന്നതിന് ടെന്‍ഡര്‍ അനുവദിച്ചു. കുറഞ്ഞ ടെന്‍ഡര്‍ നല്‍കിയ മലപ്പുറം ഫിഡ്‌കോ എന്റര്‍പ്രൈസിസിന് നല്‍കി. 51 അങ്കണവാടിയാണ് നഗരസഭക്ക് കീഴിലുള്ളത്. അങ്കണവാടികളിലെ ടീച്ചര്‍മാര്‍ക്കും ഹെല്‍പ്പര്‍ക്കും വര്‍ധിപ്പിച്ച മാസവേതനം നല്‍കാനും തീരുമാനിച്ചു. രണ്ട് തവണ ടെന്‍ഡര്‍ നല്‍കിയിട്ടും നടപടികളാകാത്ത പദ്ധതികള്‍ക്ക് ക്വട്ടേഷന്‍ പ്രകാരം നിര്‍മാണത്തിന് അനുമതി നല്‍കി. കാഞ്ഞിരപ്പറമ്പ് റോഡ് റീ-ടാറിങ്, കുമ്മിണിപ്പാറ താഴത്തുപറമ്പ് റോഡ്, തുറക്കല്‍ ഇ.എം.ഇ.എ സ്‌കൂള്‍ റോഡ്, ബ്ലോക്ക് ഓഫിസ് റോഡ് തുടങ്ങിയവയുടെ നിര്‍മാണമാണ് ആരംഭിക്കുക. കിഴക്കെ ചുങ്കം കുടിവെള്ള പദ്ധതിയുടെ വാട്ടര്‍ മീറ്റര്‍ സ്ഥാപിക്കുന്നതിന് ടെന്‍ഡര്‍ നടപടികളും കൗണ്‍സില്‍ യോഗം അംഗീകരിച്ചു.