ആലുവ: ബൈപാസ് ജങ്ഷനില്‍ വ്യാപാരിയെ ആക്രമിച്ച് മാരകമായി പരുക്കേല്‍പ്പിക്കുകയും പൊതു സ്ഥലത്ത് പൊലിസ് ഉദ്യോഗസ്ഥരെ ആക്രമിക്കുകയും ചെയ്ത സംഘത്തില്‍ നിന്നും ഓടി രക്ഷപ്പെട്ട നാല് പേരെയും ഉടന്‍ അറസ്റ്റ് ചെയ്ത് നടപടി സ്വീകരിക്കണമെന്ന് ആലുവ മര്‍ച്ചന്റ്‌സ് അസോസിയേഷന്‍ പ്രവര്‍ത്തക സമിതി യോഗം ആവശ്യപ്പെട്ടു.
ഇതു സംബന്ധിച്ച് മുഖ്യമന്ത്രിക്കും ഡി.ജി.പിക്കും പരാതി നല്‍കുമെന്നും നടപടി എടുക്കാത്ത പക്ഷം സമര പരിപാടികള്‍ക്ക് രൂപം നല്‍കുമെന്ന് ആലുവ മര്‍ച്ചന്റ്‌സ് അസോസിയേഷന്‍ ഭാരവാഹികളായ ഇ.എം നസീര്‍ബാബു, അഡ്വ. എ.ജെ റിയാസ്, ജോണി മൂത്തേടന്‍ എന്നിവര്‍ അറിയിച്ചു.
ശനിയാഴ്ച്ച വൈകിട്ട് നാലിനാണ് ഭീകരാന്തരീക്ഷം സൃഷ്ടിച്ച് കൊണ്ട് 10 പേരടങ്ങുന്ന ഗുണ്ടാസംഘം അഴിഞ്ഞാടിയത്. വ്യാപാര സ്ഥാപനങ്ങളിലേക്ക് പ്രവേശനം തടഞ്ഞ് കൊണ്ട് പാര്‍ക്ക് ചെയ്ത ടെമ്പോ ട്രാവലര്‍ മാറ്റിയിടാന്‍ ആവശ്യപ്പെട്ടതോടെയാണ് ഗുണ്ടാസംഘം അക്രമം ആരംഭിച്ചത്. ആലുവ മര്‍ച്ചന്റ അസോസിയേഷന്‍ എക്‌സിക്യൂട്ടീവ് കമ്മിറ്റി അംഗവും ജീവകാരുണ്യ പ്രവര്‍ത്തകനുമായ അസീസ് അല്‍ബാബിനെയും മകനെയും കൂടാതെ ചിത്രകാരനായ റിയാസ് കരിപ്പാല, വ്യാപാരിയായ ഇബ്രാഹീം കുട്ടി എന്നിവര്‍ക്കുമാണ് മര്‍ദനമേറ്റത്.
വിവരം അറിഞ്ഞ് എത്തിയ എസ്.ഐ ഫൈസലിനെയും സി.ഐ വിഷാല്‍ ജോണ്‍സന്‍ എന്നിവര്‍ക്കു നേരെയും അക്രമമുണ്ടായി. സംഘത്തില്‍ നിന്ന് 4 പേര്‍ സംഭവസ്ഥലത്ത് നിന്നും ഓടി രക്ഷപ്പെട്ടു.
വരാപ്പുഴ കേന്ദ്രീകരിച്ച് അടുത്തയിടയായി രൂപപ്പെട്ട ഗുണ്ടാസംഘത്തില്‍പ്പെട്ടവരാണ് അക്രമത്തില്‍ ഉള്‍പ്പെട്ടതെന്നാണ് വിവരം. പിടിയിലായവരെ ഇന്നലെ ആലുവ മജിസ്‌ട്രേറ്റിന്റെ മുന്‍പാകെ ഹാജരാക്കി റിമാന്‍ഡ് ചെയ്തു.