ടെഹ്റാന്‍: ഇറാനിലുള്ള ഇന്ത്യന്‍ പൗരന്‍മാര്‍ ഉടന്‍ രാജ്യം വിടണമെന്ന് നിര്‍ദേശം പുറപ്പെടുവിച്ച് ടെഹ്റാനിലെ ഇന്ത്യന്‍ എംബസി. ഇന്ത്യന്‍ പൗരന്മാര്‍ ഇറാനിലേക്ക് യാത്ര ചെയ്യരുതെന്നും നിര്‍ദേശങ്ങളില്‍ വ്യക്തമാക്കുന്നു.  നിലവിലെ യുദ്ധസാഹചര്യങ്ങള്‍ കണക്കിലെടുത്താണ് എംബസി പുതിയ നിര്‍ദേശം പുറപ്പെടുവിച്ചിരിക്കുന്നത്. ടെഹ്റാനിലെ ഇന്ത്യന്‍ എംബസി പുറപ്പെടുവിക്കുന്ന എട്ടാമത്തെ യാത്രാ നിര്‍ദേശമാണിത്.

ടെഹ്റാന്റെ മിസൈല്‍ ആക്രമണങ്ങള്‍ക്ക് മറുപടിയായി മധ്യ-പടിഞ്ഞാറന്‍ ഇറാന്‍ ലക്ഷ്യമാക്കി ഇസ്‌റാഈല്‍ വ്യോമാക്രമണം നടത്തിയിരുന്നു. ഇത് കഴിഞ്ഞ് മണിക്കൂറുകള്‍ക്കകമാണ് എംബസി നിര്‍ദേശം പുറത്തിറക്കിയിരിക്കുന്നത്. ഇറാനിലുള്ള വിദ്യാര്‍ത്ഥികള്‍, വ്യവസായികള്‍, തീര്‍ത്ഥാടകര്‍, വിനോദസഞ്ചാരികള്‍ ഉള്‍പ്പെടെയുള്ള എല്ലാ ഇന്ത്യന്‍ പൗരന്മാര്‍ക്കും ഈ നിര്‍ദ്ദേശം ബാധകമാണെന്നും എംബസി അറിയിക്കുന്നു. 

ALSO READ: തിരിച്ചടിച്ച് വീണ്ടും ഇറാന്‍, ഇനിയും അക്രമിച്ചാല്‍ യുദ്ധമെന്ന് മുന്നറിയിപ്പ്;  ഇസ്‌റാഈലില്‍ ജാഗ്രത, സ്‌കൂളുകള്‍ അടച്ചു, ആശുപത്രികള്‍ ഭൂഗര്‍ഭ അറകളിലേക്ക്

ഫെബ്രുവരിയില്‍ ഇസ്‌റാഈലും അമേരിക്കയും ഇറാന്‍ ലക്ഷ്യമിട്ട് തീര്‍ത്തും ഏകപക്ഷീയമായി നടത്തിയ ആക്രമണത്തോടെയാണ് മേഖലയില്‍ സംഘര്‍ഷം കടുത്തത്. ആക്രമണത്തിന് ഇറാന്‍ തിരിച്ചടി നല്‍കി. അന്ന് ഒന്‍പതിനായിരത്തോളം ഇന്ത്യക്കാരുണ്ടായിരുന്നു ഇറാനില്‍.  ഏപ്രില്‍ മാസത്തില്‍ പ്രഖ്യാപിച്ച താല്‍ക്കാലിക വെടിനിര്‍ത്തല്‍ സമയത്ത് രാജ്യം വിടാന്‍ എംബസി നിര്‍ദ്ദേശം നല്‍കി. അന്ന് 1,800-ഓളം ഇന്ത്യക്കാര്‍ സുരക്ഷിതമായി നാട്ടിലേക്ക് മടങ്ങിം. എന്നാല്‍ 7,500-ഓളം ഇന്ത്യന്‍ പൗരന്മാര്‍ ഇപ്പോഴും ഇറാനില്‍ തുടരുന്നുണ്ടെന്നാണ് ഔദ്യോഗിക കണക്കുകള്‍ പറയുന്നത്.