ചവറ: ആറ്റ് നോറ്റ് വാങ്ങിയ പശുക്കുട്ടിയുടെ പ്രസവത്തില്‍ കണ്‍മണികള്‍ പിറന്നത് മൂന്ന് പേര്‍. മൂന്നും പെണ്‍കുട്ടികള്‍ കൂടിയായതോടെ സന്തോഷത്തോടെയുള്ള പരിചരണത്തിലാണ് പന്മന മനയില്‍ വലിയത്ത് സിനോജും കുടുംബവും. രണ്ട് മാസക്കാലം മുന്‍പ് സേലത്ത് നിന്നും വാങ്ങിയ എച്ച്.എഫ് ഇനത്തില്‍ പെട്ട ആസ്‌ട്രേലിയന്‍ ബ്രീഡ് ഇനത്തില്‍പ്പെട്ട പശുവാണ് രണ്ടാം പ്രസവത്തില്‍ മൂന്ന് കുട്ടികളെ നല്‍കി കുടുംബത്തിന് കൗതുകവും സന്തോഷവും സമ്മാനിച്ചത്.
അഞ്ച് വര്‍ഷക്കാലമായി ക്ഷീര കാര്‍ഷിക മേഖലയില്‍ സജീവമായ തനിക്കിത് ആദ്യ അനുഭവമാണന്ന് സിനോജ് പറയുന്നു. കറുമ്പിപ്പശുവിന്റെ അകിടിന്‍ ചുവട്ടില്‍ കുറുമ്പ് കാട്ടി നില്‍ക്കുന്ന കിടാരികളെ കാണാന്‍ നിരവധി പേരാണ് എത്തുന്നത്. വ്യാഴാഴ്ച പുലര്‍ച്ചെ 4 മണിയോടെ നടന്ന പ്രസവത്തിന് പന്മന മൃഗാശുപത്രി ഡോക്ടര്‍ സാജനാണ് നേതൃത്വം വഹിച്ചത്. നാല്പതോളം പശുക്കളും കിടാരികളും ഉള്ള ഫാമില്‍ സുഖ പരിചരണത്തിലാണ് കറുമ്പിയും മൂന്ന് പെണ്‍കുട്ടികളും.