കല്ലമ്പലം: കൈ കാണിച്ചിട്ട് നിര്‍ത്താതെ പോയ സൂപ്പര്‍ഫാസ്റ്റ് ബസിന് നേരെ യുവാക്കള്‍ കല്ലെറിഞ്ഞു. അപകടം ഒഴിവായത് തലനാരിഴയ്ക്ക്. ദേശീയപാതയില്‍ ആഴാംകോണം ജങ്ഷനില്‍ ഇന്നലെ വൈകിട്ട് 3.30 ഓടെയായിരുന്നു സംഭവം.
പാലക്കാട് നിന്ന് തിരുവനന്തപുരത്തേക്ക് പോവുകയായിരുന്ന കെ.എസ്.ആര്‍.ടി.സി സൂപ്പര്‍ഫാസ്റ്റ് ബസിന് നേരെയാണ് ആക്രമണം ഉണ്ടായത്. ആഴാംകോണത്തെത്തിയപ്പോള്‍ മൂന്നു ചെറുപ്പക്കാര്‍ ബസിനു കൈ കാണിച്ചു. സൂപ്പര്‍ഫാസ്റ്റിന് പൊതുവേ സ്റ്റോപ്പില്ലാത്ത സ്ഥലമാണിവിടം. മാത്രമല്ല ബസ് നിറയെ യാത്രക്കാരുമുണ്ടായിരുന്നു.  നിര്‍ത്താതെ പോയ ബസിന് കൈകാണിച്ച യുവാക്കളിലൊരാള്‍ കരിങ്കല്‍ ചീളെടുത്ത് എറിയുകയായിരുന്നു. കല്ല് ബസിന്റെ ബോഡിയില്‍ അതിശക്തമായി പതിച്ച ശബ്ദം കേട്ട് ബസ് നിര്‍ത്തി. തൊട്ടടുത്ത പൊലിസ് സ്റ്റേഷനില്‍ യാത്രക്കാരും കണ്ടക്ടറും വിവരമറിയിച്ചെങ്കിലും പൊലിസ് എത്തിയില്ല. ബസ് ജീവനക്കാരും യാത്രക്കാരും എറിഞ്ഞ കല്ലുമായെത്തി ചോദ്യം ചെയ്‌തെങ്കിലും യുവാക്കള്‍ തിരികെ ഭീഷണിപ്പെടുത്തുകയായിരുന്നു. പൊലിസിനു വേണ്ടി യാത്രക്കാര്‍ കാത്തു നിന്ന് മുഷിഞ്ഞപ്പോള്‍ കല്ലെറിഞ്ഞ യുവാക്കള്‍ സ്ഥലംവിട്ടു. തുടര്‍ന്ന് ബസും തിരുവനന്തപുരത്തേക്ക് പോയി. കല്ലെറിഞ്ഞത് വിദ്യാര്‍ഥികളല്ലെന്ന് സംഭവസ്ഥലത്ത് തടിച്ചുകൂടിയ വിദ്യാര്‍ഥികള്‍ പറഞ്ഞു.