താമരശ്ശേരി: താലൂക്ക് ആശുപത്രിയില്‍ ആര്‍ദ്രം മിഷന്‍ പദ്ധതി പ്രഖ്യാപനവും ഒ.പി- കാഷ്വാലിറ്റി ബ്ലോക്ക് ഉദ്ഘാടനവും ചൊവ്വാഴ്ച നടക്കും. രാവിലെ 11 ന് നടക്കുന്ന പരിപാടി ആരോഗ്യ വകുപ്പ് മന്ത്രി കെ.കെ ശൈലജ ഉദ്ഘാടനം ചെയ്യും.
കാരാട്ട് റസാഖ് എം.എല്‍.എ അധ്യക്ഷനാവും. പകര്‍ച്ചവ്യാധികള്‍ , ജീവിത ശൈലീരോഗങ്ങള്‍ എന്നിവ നിയന്ത്രിക്കുന്നതിനും കാന്‍സര്‍ മുതലായ മാരക രോഗങ്ങള്‍ നേരത്തെതന്നെ കണ്ടുപിടിക്കുന്നതിനുമുള്ള സൗകര്യങ്ങളും വിഷാദരോഗികള്‍ക്ക് ചികിത്സ നല്‍കുന്നതിനുള്ള ഡിപ്രഷന്‍ ക്ലിനിക്കുകളും പദ്ധതിയുടെ ഭാഗമായി സജ്ജമാക്കും.
കൂടുതല്‍ സ്‌പെഷാലിറ്റി ഡോക്ടര്‍മാരുടെ സേവനം താലൂക്ക് ആശുപത്രിയില്‍ ഉറപ്പുവരുത്തും. ഐ.സി.യു സൗകര്യങ്ങളും മികച്ചതാക്കും. പരിപാടിയില്‍ പണി പൂര്‍ത്തീകരിച്ച ഒ.പി, കാഷ്വാലിറ്റി ബ്ലോക്കിന്റെ ഉദ്ഘാടനവും നടക്കും. കാരുണ്യ പദ്ധതി നടപ്പിലാകുന്നതോടെ കൂടുതല്‍ ഡോക്ടര്‍മാരുടെയും ജീവനക്കാരുടെയും സേവനങ്ങള്‍ ഇവിടെ ലഭ്യമാകും.