സ്വന്തം ലേഖകന്‍ 

കോട്ടയം: കൊവിഡ് 19 രോഗബാധയില്‍ നിന്നും മുക്തരായി ജീവിതത്തിലേക്ക് തിരികെ വന്നതിന്റെ സന്തോഷത്തിലാണ് ചെങ്ങളത്തെ യുവദമ്പതികള്‍. 

ഇറ്റലിയില്‍ നിന്നെത്തിയ പത്തനംതിട്ട റാന്നി സ്വദേശികളായ ബന്ധുക്കളെ വിമാനത്താവളത്തില്‍ നിന്നും കൊണ്ടുവരാന്‍ പോയതിന് പിന്നാലെയായിരുന്നു ദമ്പതികള്‍ക്കും കൊവിഡ് 19 ബാധിച്ചത്. സ്വന്തം ജീവനും ജീവിതവും നോക്കാതെ അര്‍പണബോധത്തോടെ തങ്ങളെ ചികിത്സിച്ച ഡോക്ടര്‍മാര്‍ക്കും പരിചരിച്ച നഴ്‌സുമാര്‍ക്കും മറ്റ് ജീവനക്കാര്‍ക്കും നന്ദി പറയുകയാണ് ഈ നഴ്‌സിങ് ദമ്പതികള്‍. ഡോ.സജിത്കുമാര്‍, ഡോ. ഹരികൃഷ്ണന്‍, ഡോ.ആശ എന്നിവരുടെ നേതൃത്വത്തിലായിരുന്നു ചികിത്സ. കഴിഞ്ഞ എട്ടിനാണ് കോട്ടയം മെഡിക്കല്‍ കോളജ് ആശുപത്രിയിലെ ഐസൊലേഷന്‍ വാര്‍ഡില്‍ കൊവിഡ് 19 രോഗലക്ഷണവുമായി ഇരുവരെയും പ്രവേശിപ്പിച്ചത്. രണ്ട് ദിവസത്തിനകം രോഗം സ്ഥിരീകരിച്ച് പരിശോധന ഫലം എത്തി. കൊവിഡ് 19 രോഗം ബാധിച്ച ഭാര്യാ പിതാവിന്റെ വൃദ്ധദമ്പതികളായ മാതാപിതാക്കളെയും ചികിത്സയ്ക്കായി ഐസൊലേഷന്‍ വാര്‍ഡില്‍ പ്രവേശിപ്പിച്ചിരുന്നു. 

ചികിത്സയുടെ 19 ദിവസങ്ങളാണ് കടന്നു പോയത്. കൂട്ടിന് മൊബൈല്‍ ഫോണ്‍ മാത്രം. നാലരവയസുള്ള മകളും ഐസൊലേഷന്‍ മുറിയില്‍ ഇവര്‍ക്കൊപ്പമുണ്ടായിരുന്നു. മകളെ കൂടി ആശുപത്രിയില്‍ എത്തിച്ചതോടെ മനസിന്റെ് നിയന്ത്രണം വിട്ടു പോകുമെന്ന ആശങ്കയിലായിരുന്നു ഇരുവരും. എന്നാല്‍, ചികിത്സിച്ച ഡോക്ടര്‍മാരും നഴ്‌സുമാരും അടക്കം ഐസൊലേഷന്‍ വാര്‍ഡില്‍ ജോലി ചെയ്യുന്ന ജീവനക്കാരും നല്‍കിയ പിന്‍തുണയാണ് ജീവിതത്തിലേക്ക് തിരിച്ചു നടത്തിച്ചത്. മകള്‍ക്ക് രോഗബാധയില്ലെന്ന് കണ്ടെത്തിയിരുന്നു. 

എങ്ങനെയാണ് അവര്‍ക്ക് നന്ദി പറയേണ്ടതെന്ന് അറിയില്ല, അവര്‍ ദൈവദൂതരും മാലാഖമാരുമാണെന്ന് വിശ്വസിക്കുന്നതായി യുവാവ് പറഞ്ഞു. ഫോണില്‍ വിളിച്ച് ആരോഗ്യ വിവരങ്ങള്‍ അന്വേഷിച്ച് പ്രതിപക്ഷ നേതാവ് രമേശ് ചെന്നിത്തലയും സി.പി.എം ജില്ലാ സെക്രട്ടറി വി.എന്‍ വാസവനും തോമസ് ചാഴിക്കാടന്‍ എം.പിയുമൊക്കെ ആശ്വസിപ്പിച്ചു. ഇറ്റലിയിലും പിന്നീട് ദുബൈയിലും അബുദാബിയിലും നഴ്‌സായി ജോലി ചെയ്യുകയായിരുന്നു യുവാവ്. ഇറ്റലിയില്‍ നഴ്‌സായ ഭാര്യ 17 വര്‍ഷമായി മാതാപിതാക്കള്‍ക്കൊപ്പം അവിടെയാണ്. രണ്ടു പേര്‍ക്കും അവധി കിട്ടിയപ്പോള്‍ നാട്ടിലെത്തുകയായിരുന്നു. 

പിന്നീടാണ് കൊവിഡ് ലോകത്ത് പടരുന്നത്.  ഇരുവരും രോഗവിമുക്തരായെങ്കിലും മെഡിക്കല്‍ ബോര്‍ഡ് കൂടി ആരോഗ്യസ്ഥിതിയെ സംബന്ധിച്ച് വിലയിരുത്തല്‍ നടത്തിയ ശേഷമേ ഡിസ്ചാര്‍ജ് ചെയ്യുന്നതിനെ കുറിച്ച് തീരുമാനം ഉണ്ടാകൂ. തങ്ങള്‍ രോഗവിമുക്തരായതിനാല്‍ ഐസൊലേഷന്‍ വാര്‍ഡില്‍ കഴിയുന്ന വൃദ്ധദമ്പതികളായ ബന്ധുക്കളെ പരിചരിക്കാനുള്ള സന്നദ്ധതയും ഇരുവരും അറിയിച്ചിട്ടുണ്ട്.