മലപ്പുറം: സംസ്ഥാന എന്‍ജിനീയറിങ് എന്‍ട്രന്‍സ് പരീക്ഷയില്‍ മലപ്പുറത്തു നിന്നും ഇത്തവണ 5168 പേര്‍ ഇടം പിടിച്ചു. മൂന്നു റാങ്കുകളുടെ മധുരനേട്ടവും ആദ്യ ആയിരത്തില്‍ 119 പേര്‍ ഇടം നേടിയും ജില്ല മികവ് കൊയ്തു. സംസ്ഥാനത്ത് ആദ്യ ആയിരത്തില്‍ ഏറ്റവും കൂടുതല്‍ വിദ്യാര്‍ഥികള്‍ ഇടം നേടിയ രണ്ടാമത്തെ ജില്ലയാണ് മലപ്പുറം. 185 പേര്‍ ഇടം നേടിയ എറണാംകുളത്തിനാണ് ഒന്നാം സ്ഥാനം.
എന്‍ജിനീയറിങ് എന്‍ട്രന്‍സില്‍ മലപ്പുറം കുന്നുമ്മല്‍ ജൂബിലി റോഡിലെ രാം കേശവ് സംസ്ഥാനത്ത് എട്ടാം റാങ്കോടെ ജില്ലയില്‍ ഒന്നാമനായി. ആര്‍കിടെക്ചര്‍ വിഭാഗത്തില്‍ പന്തലൂര്‍ മറൂക്കാട്ട് പറമ്പില്‍ മുഹ്‌സിന്‍ മുഹമ്മദലി എം.പിക്കാണ് മൂന്നാം റാങ്ക്. എസ്.സി വിഭാഗത്തില്‍ സംസ്ഥാനത്ത് ഒന്നാം സ്ഥാനവും മലപ്പുറം നേടി. കൊണ്ടോട്ടി കരിപ്പൂര്‍ സ്വദേശി ഷിബൂസ് പിയാണ് റാങ്കിനര്‍ഹനായത്.
മെഡിക്കല്‍ എന്‍ട്രന്‍സ് പരീക്ഷയിലെ മികച്ച വിജയത്തിന്റെ മധുരം മാറും മുമ്പേയാണ് എന്‍ജിനീയറിങിലും മലപ്പുറത്തിന്റെ റാങ്കുതുടര്‍ച്ച. മെഡിക്കല്‍ എന്‍ട്രന്‍സ് പരീക്ഷയില്‍ നാല്, ഏഴ്, പത്ത്, പതിനൊന്ന് റാങ്കുകള്‍ കൊയ്തും ആദ്യ നൂറില്‍ പതിനാറ് പേരും ആദ്യ ആയിരം പേരില്‍ 158 പേരും മലപ്പുറത്തു നിന്നും ഇടം പിടിച്ചിരുന്നു.