കണ്ണൂര്‍: സ്‌കൂളുകളില്‍ ശുചിമുറി ഉള്‍പ്പെടെയുള്ള അടിസ്ഥാനസൗകര്യങ്ങള്‍ ഒരുക്കിയിട്ടുണ്ടോയെന്ന് തദ്ദേശസ്ഥാപന അധികൃതര്‍ പരിശോധിച്ചു റിപ്പോര്‍ട്ട് നല്‍കണമെന്ന് സര്‍ക്കാര്‍ ഉത്തരവിറക്കി.

എയ്ഡഡ്, അണ്‍ എയ്ഡഡ് സ്‌കൂളുകളില്‍ ശുദ്ധമായ കുടിവെള്ളം, ജലലഭ്യതയോടുകൂടിയ ശുചിമുറി, പെണ്‍കുട്ടികള്‍ക്കായി നാപ്കിന്‍ വെന്‍ഡിങ് മെഷീന്‍ എന്നിവ ഒരുക്കിയിട്ടുണ്ടോ എന്നു തദ്ദേശസ്ഥാപനങ്ങള്‍ പരിശോധിക്കണമെന്നാണ് സര്‍ക്കാര്‍ ഉത്തരവ്.

ബന്ധപ്പെട്ട തദ്ദേശ സ്വയംഭരണ സ്ഥാപന അധികൃതര്‍ വര്‍ഷത്തില്‍ രണ്ടുതവണ പരിശോധിക്കണമെന്നും ശ്രദ്ധയില്‍പ്പെടുന്ന വീഴ്ചകളും വീഴ്ച വരുത്തുന്ന സ്‌കൂള്‍ അധികൃതര്‍ക്കെതിരേ ശക്തമായ നടപടി സ്വീകരിക്കാന്‍ പൊതുവിദ്യാഭ്യാസ ഡയറക്ടര്‍ക്കു റിപ്പോര്‍ട്ട് ചെയ്യണമെന്നും തദ്ദേശഭരണ ജോയിന്റ് സെക്രട്ടറി ജെ. ഉണ്ണികൃഷ്ണന്‍ ഇറക്കിയ ഉത്തരവില്‍ വ്യക്തമാക്കി.

സംസ്ഥാന ബാലാവകാശ കമ്മിഷന്‍ നിര്‍ദേശത്തിന്റെ അടിസ്ഥാനത്തിലാണു സര്‍ക്കാര്‍ നടപടി.
ഇക്കാര്യത്തില്‍ പഞ്ചായത്ത് ഡയറക്ടര്‍, നഗരകാര്യ ഡയറക്ടര്‍, ഗ്രാമവികസന കമ്മിഷണര്‍ എന്നിവര്‍ ഉചിതമായ നടപടി സ്വീകരിക്കണമെന്നും ഉത്തരവില്‍ വ്യക്തമാക്കി.

രാവിലെ 8.45 മുതല്‍ വൈകുന്നേരം 4.45 വരെയുള്ള അധ്യയനസമയം സംസ്ഥാനത്തെ പ്ലസ്‌വണ്‍, പ്ലസ്.ടു വിദ്യാര്‍ഥികളെ ദുരിതത്തിലാക്കുന്നുവെന്നു പരാതി ലഭിച്ചതിനെ തുടര്‍ന്നാണു ബാലാവകാശ കമ്മിഷന്‍ വിഷയത്തില്‍ ഇടപെട്ടത്.