അഹമ്മദാബാദ്: അഹമ്മദാബാദില്‍ നടന്ന സ്‌ഫോടനപരമ്പരയിലെ പ്രതികളിലൊരാളെ എട്ടുവര്‍ഷത്തിനുശേഷം ഗുജറാത്ത് തീവ്രവാദ വിരുദ്ധ സ്‌ക്വാഡ്(എ.ടി.എസ്) അറസ്റ്റ് ചെയ്തു. നസീര്‍ എന്ന പര്‍വേശ് രംഗ്‌റേസിനെയാണ് അറസ്റ്റ് ചെയ്തതെന്ന് പൊലിസ് ഡെപ്യൂട്ടി കമ്മിഷണര്‍ അമര്‍നാഥ് റെഡ്ഢി അറിയിച്ചു.

2008 ജൂലൈ 26നാണ് അഹമ്മദാബാദില്‍ സ്‌ഫോടനപരമ്പരകള്‍ ഉണ്ടായത്. അന്വേഷണത്തിനിടെ ഒളിവില്‍പോയ പ്രതിയെ കണ്ടെത്താനാകാത്തതിനെത്തുടര്‍ന്നു കോടതി അറസ്റ്റ് വാറന്റ് പുറപ്പെടുവിച്ചിരുന്നു.

പ്രതി ബല്‍ഗാവിയെന്ന സ്ഥലത്തുണ്ടെന്നു കണ്ടെത്തിയതോടെ എ.ടി.എസ് ഇന്‍സ്‌പെക്ടര്‍ ഭവേഷിന്റെ നേതൃത്വത്തിലുള്ള സംഘം ഇവിടെയെത്തി അറസ്റ്റ് ചെയ്യുകയായിരുന്നുവെന്നും ഡെപ്യൂട്ടി കമ്മിഷണര്‍ അറിയിച്ചു.അഹമ്മദാബാദ് സ്‌ഫോടനത്തില്‍ 56 പേര്‍ കൊല്ലപ്പെടുകയും ഇരുന്നൂറോളം പേര്‍ക്ക് മാരകമായി പരുക്കേല്‍ക്കുകയും ചെയ്തിരുന്നു.

സ്‌ഫോടനത്തിനുശേഷം ബല്‍ഗാവിയില്‍ ഒളിവില്‍ കഴിഞ്ഞുവരികയായിരുന്നു ഇയാളെന്നും പൊലിസ് അറിയിച്ചു.