ശ്രീനഗര്‍: കശ്മീരില്‍ തീവ്രവാദ സംഘടനയായ ലഷ്‌കറെ ത്വയ്ബയുടെ കമാന്‍ഡറെ സുരക്ഷാ സേന അറസ്റ്റ് ചെയ്തു. വടക്കന്‍ കശ്മീരില്‍ കുപ്‌വാര ജില്ലയില്‍നിന്നാണ് അബു ഉകാഷ എന്ന ഹന്‍സുല്ലയെ അറസ്റ്റ് ചെയ്തതെന്നു പൊലിസ് അറിയിച്ചു. കുപ്‌വാരയിലെ സോഗം പ്രദേശത്തു നടത്തിയ തെരച്ചിലിലാണ് ഇയാളെ അറസ്റ്റ് ചെയ്തത്.

ഉകാഷയില്‍നിന്നു ലഭിച്ച വിവരത്തിന്റെ അടിസ്ഥാനത്തില്‍ സോഗം മേഖലയില്‍ വനത്തില്‍വച്ച് ലഷ്‌കറെ ത്വയ്ബയുടെ മറ്റൊരു പ്രവര്‍ത്തകനായ അബൂബക്കര്‍ എന്നയാളെയും സുരക്ഷാ സേന പിന്തുടര്‍ന്നു പിടികൂടി. തീവ്രവാദികള്‍ ഒളിച്ചിരിക്കുന്നുവെന്ന സംശയത്തെ തുടര്‍ന്നു സുരക്ഷാ സേനയുടെ തെരച്ചില്‍ ഈ മേഖലയില്‍ തുടരുകയാണെന്നും വിവരമുണ്ട്. പാക് സ്വദേശിയാണ് അറസ്റ്റിലായ ഉകാഷയെന്നാണ് സുരക്ഷാ സേന അറിയിച്ചത്.