എടച്ചേരി: ചരിത്രവിജയം നേടി നാദാപുരം മേഖലയിലെ സര്‍ക്കാര്‍ സ്‌കൂളുകള്‍. വളയം ഗവ. ഹയര്‍ സെക്കന്‍ഡറി, വെള്ളിയോട് ഗവ. ഹയര്‍ സെക്കന്‍ഡറി, കല്ലാച്ചി ഗവ. ഹയര്‍ സെക്കന്‍ഡറി എന്നീ വിദ്യാലയങ്ങളാണ് നൂറുമേനി വിജയം കൊയ്തത്.
വളയം സ്‌കൂളില്‍ പരീക്ഷയെഴുതിയ 186 കുട്ടികളില്‍ മുഴുവന്‍ പേരും വിജയം കരസ്ഥമാക്കി. അറുപത് വര്‍ഷത്തെ ചരിത്രത്തിനിടയില്‍ ആദ്യമായാണ് വളയത്ത് പരീക്ഷയെഴുതിയ മുഴുവന്‍ വിദ്യാര്‍ഥികളും വിജയിക്കുന്നത്.
വെള്ളിയോട് ഗവ. ഹയര്‍ സെക്കന്‍ഡറിയില്‍ 97 വിദ്യാര്‍ഥികളും വിജയം കൈവരിച്ചു. കല്ലാച്ചി ഗവ. ഹയര്‍ സെക്കന്‍ഡറിയില്‍ പരീക്ഷയെഴുതിയ 139 കുട്ടികളും വിജയിച്ചു. ഇരിങ്ങണ്ണൂര്‍ ഹയര്‍ സെക്കന്‍ഡറി സ്‌കൂള്‍, വിലങ്ങാട് സെന്റ് ജോര്‍ജ്ജ് ഹൈസ്‌കൂള്‍ വിലങ്ങാട്, നാദാപുരം ടി.ഐ.എം എന്നീ എയിഡഡ് സ്‌കൂളുകളും തിളക്കവിജയം നേടി.
വാണിമേല്‍ ഹയര്‍ സെക്കന്‍ഡറി ക്രസന്റില്‍ 99 ശതമാനവും പുറമേരി 99.6, ഉമ്മത്തൂര്‍ ഹയര്‍ സെക്കന്‍ഡറിയില്‍ 99.22, പേരോട് എം.ഐ.എമ്മില്‍ 99.5 ശതമാനവും വിജയം കൈവരിച്ചു.