പൊന്നാനി: ശക്തമായ കാറ്റിലും മഴയിലും പൊന്നാനി താലൂക്കിന്റെ വിവിധയിടങ്ങളില്‍ വന്‍ നാശനഷ്ടം. പതിനഞ്ചോളം വീടുകളുടെ മേല്‍ക്കൂര തകര്‍ന്നു.
കഴിഞ്ഞദിവസം രാത്രിയിലുണ്ടായ ശക്തമായ കാറ്റിലും മഴയിലും തീരദേശ മേഖലയിലും മാറഞ്ചേരി പുറങ്ങിലുമാണ് വ്യാപക നാശനഷ്ടമുണ്ടായത്. നഗരസഭയിലെ 41, 42, 43, 45 വാര്‍ഡുകളിലാണ് കാറ്റില്‍ തെങ്ങും മരങ്ങളും കടപുഴകി വീടുകള്‍ക്ക് മുകളിലേക്ക് പതിച്ചത്. പൊന്നാനി പള്ളിപ്പടിയിലെ ചന്തക്കാരന്റെ ഐസീബിയുടെ വീടിനു മുകളിലേക്ക് തെങ്ങ് കടപുഴകി വീണതിനെത്തുടര്‍ന്നുണ്ടായ അപകടത്തില്‍ വീടിനകത്തുണ്ടായിരുന്ന എട്ടുപേര്‍ക്ക് പരുക്കേറ്റു. തീരദേശ മേഖലയില്‍ പാതിരാത്രിയോടെ ശക്തമായ കാറ്റാണ് വീശിയടിച്ചത്. നിരവധി തെങ്ങുകള്‍ കടപുഴകിയും പൊട്ടിയുമാണ് വീടുകള്‍ക്ക് മുകളിലേക്ക് പതിച്ചത്. പലയിടത്തും ഇലക്ട്രിക് പോസ്റ്റുകളും മുറിഞ്ഞു വീണു. ഇതിനാല്‍ ഈ മേഖലകളില്‍ രാത്രിയില്‍ വൈദ്യുതി പൂര്‍ണമായും നിലച്ചു.
ലക്ഷങ്ങളുടെ നാശനഷടമാണ് തീരദേശ മേഖലയിലുണ്ടായത്. രാവിലെ പൊന്നാനി വില്ലേജ് ഓഫിസ് അധികൃതരും കൃഷി ഓഫിസറും സ്ഥലത്തെത്തി നാശനഷ്ടം വിലയിരുത്തി. പത്തു വീടുകള്‍ പൂര്‍ണമായും അഞ്ച് വീടുകള്‍ ഭാഗികമായും തകര്‍ന്നു.