മലപ്പുറം: പ്രസ് ക്ലബില്‍ ആര്‍.എസ്.എസുകാര്‍ നടത്തിയത് ഭീകരാക്രമണത്തിനുതുല്യമായ കാടത്തമാണെന്ന് മുതിര്‍ന്ന കോണ്‍ഗ്രസ് നേതാവ് എ.കെ ആന്റണി. ഇത് കേട്ടുകേള്‍വിയില്ലാത്തതാണ്. ഭീകരവാദികളെപ്പോലെ മുഖംമൂടി ധരിച്ചെത്തി ആക്രമിച്ച് കൊലപ്പെടുത്തുന്നതിന് സമാനമായ രീതിയിലാണ് ആര്‍.എസ്.എസുകാര്‍ എത്തിയത്.
ഇതിനെതിരേ മുഖ്യമന്ത്രിയും ഡി.ജി.പിയും കാര്യമായി ഇടപെടണം. സംഭവം രാജ്യത്തെ ആദ്യത്തേതും അവസാനത്തേതുമാകണം. അക്രമം നടത്തിയവരെ മാത്രമല്ല, അതിനുപിന്നില്‍ പ്രവര്‍ത്തിച്ചവരെയും പിടികൂടണമെന്നും അദ്ദേഹം ആവശ്യപ്പെട്ടു. പരുക്കേറ്റ ഫുആദിനെ മലപ്പുറം പ്രസ് ക്ലബില്‍ സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. എം.ഐ ഷാനവാസ് എം.പി, എ.പി അനില്‍കുമാര്‍ എം.എല്‍.എ, ഡി.സി.സി പ്രസിഡന്റ് വി.വി പ്രകാശ് തുടങ്ങിയവരും ഒപ്പമുണ്ടായിരുന്നു.